「說好香港故事」合作社

[emily]

說好香港故事

透過香港人聲音，連繫世界各地香港人。

過去兩年幾，我一直好摺；直到最近幾個月，先至多咗接觸海外嘅香港人。

有個問題，大家都會問，但無一個明確嘅答案：「究竟我哋可以做啲乜？」

「究竟我哋可以做啲乜？」我成日話，公民社會去到最最最最最根本，就係呢個問題。

當然，唔係每個問題都有答案；最終要知道個答案是否成立，亦要透過實驗去測試。

今日我有個諗法，希望睇吓大家嘅意見。

緣起

01，任何一個群體，必須有自己嘅語言。香港人要繼續維繫呢個群體，呢個身份認同，就要令香港嘅語言可以承傳落去。

02，只有極少數嘅語言，例如冰島話，可以長時間保留一樣嘅發音同詞彙，大多數嘅語言，都會進化。睇返二十、三十年前嘅電影、電視，就會發覺香港話其實變化好多。對於我哋呢班已經離開咗香港人，五年、十年之後，可能發覺我哋嘅語言，同香港本地人所講嘅語言，漸漸出現差別；雖然呢個係自然現象，但設身處地去諗，亦係個令人傷感嘅事。

03，香港嘅文化，本來係一個 cosmopolitan；唔同語言、種族、文化、經歷嘅人，都可以既係香港人，亦保留各種身份。香港嘅語言，亦都受到世界各地發生嘅事所影響，不斷發展。

04，我最大嘅恐懼，唔係返唔到香港，而係返到去嘅時候，香港已經變得面目全非。從過去呢幾年香港嘅環境變化，可以想像，如果我哋唔去主動為香港人嘅語言注入活力，注入新嘅元素，香港嘅語言最終就只會由來自神奇國度嘅唯一力量所影響。

05，當香港變得越封閉，越單一，我哋就越有需要令香港文化繼續多元開放。我哋唔係要捍衛嘅，唔係一隻一成不變嘅語言，而係一個會隨時代環境變化嘅語言。香港話，其實仍然有好頑強嘅生命力；任何有生命力嘅語言，必然會隨時代發展，與時並進，推陳出新。

我哋可以做啲乜？

06，有啲已經移居海外嘅朋友，教下一代香港人嘅語言；但無咗個語境，假以時日，我哋教嘅香港話，係可能過時嘅香港話，一個相對上無咁有活力嘅版本。

07，亦都有好多人，用香港話拍緊評論，甚至寫作；我自己都係咁做。不過，我嘅感覺係，評論嘅感染力有限。或者係我嘅文筆差，演技功夫未到家，總之評論以外，我相信絕對有其他模式。

08，曾幾何時，電台有廣播劇，電視亦有處境劇，用一般人可以代入嘅角度，去講香港嘅時事。其實商台仍然有「十八樓 C 座」，但點解唔可以有更多唔同嘅場境呢？假如你講緊一班大學生嘅心聲，總唔會係茶餐廳啩？又或者一班公務員、教師、社工；甚至乎係一班賭股票、外匯嘅人，究竟乜嘢場合佢哋聚埋一齊？又會講啲乜嘢？

09，我哋可唔可以用播音劇場嘅形式，將唔同香港人嘅生活對話，去講返時下香港發生嘅事？重點係，首先要有娛樂性，唔好聽就乜都係假。其次係要反映到真實嘅心聲。

10，「點解係播音劇？Youtube 可以睇片喎。」一來，我發現好多人開住 Youtube 其實係聽聲。佢哋用 Youtube 嘅原因，只係因為 Youtube 嘅演算法不停咁「餵」內容畀佢哋；而我對演算法係好抗拒，亦唔想依賴平台嘅派送。

11，二來，聽廣播同睇片，對受眾係有唔同嘅影響；睇片嘅人係只會被動咁接受。被動接受資訊嘅觀眾，對自己睇過乜，聽過乜，只會留低好膚淺嘅印象。聽眾係要主動咁幻想佢哋心目中嘅畫面，呢個過程會令某啲人對故事有更深刻嘅印象。

12，三來，只係出聲唔出樣，可以畀更多唔方便露面嘅人參與。呢個計劃其中一個目的，就係希望用香港人嘅聲音，將唔同時空嘅香港人連繫起來。

下一步要做啲乜？

13，實驗。坦白講，除咗學生時代嘅好業餘嘅創作，我無寫劇本對白經驗，更加唔好講話聲演，所以要學嘅事情好多。但正正係呢個原因，更令我想做呢件事；學習最好嘅方法，就係邊做邊學。

14，更重要係，處境播音劇，總唔可能一條友做晒。我構想係一個合作社嘅形式，參與嘅人按簡單而合理嘅比例，分享所得收入。

15，我知道，一定有啲人嫌呢種經營模式，收入唔穩定，好大可能不足以糊口。但既然係實驗，我都唔知最終可以做到有幾大，亦暫時冇能力去承擔所有嘅風險。更重要係，我相信所有參與在其中嘅人，多少都要有啲 skin in the game ，件事成功嘅機會先至會大。

16，另一邊廂，我相信亦有人覺得：「我唔想為錢喎。」其實我明呢種心情，但我更怕好多時啲人貢獻咗時間之後，覺得自己好大犧牲，然後人與人之間嘅 boundary 就開始模糊，就開始出現紛爭。

17，設計制度最考功夫嘅地方，就係理順利益關係。另一個我希望透過實驗去學習嘅，就係點樣去經營一個合作社。當年創業，大大話話都用咗近十年，先至學識一啲其實老早就聽過嘅道理；但合作社嘛，我聽過有成功例子，但非常之少。

18，先小人，後君子，件事唔知會唔會成功，甚至可以話，存活率應該甚低。其次，就算成功，亦唔知外在嘅回報有幾大。但你從中可以得到嘅經驗同樂趣，我相信係每個人自己可以主觀咁控制得到。

19，我可以投入嘅，約莫一個星期三至四個小時；至少初期如是。我亦預期其他參與嘅朋友，有呢個咁嘅心理準備。

20，有興趣參加呢個實驗嘅朋友，可以透過以下嘅 Google Form 留低聯絡方法同意向。下一步，就係月底前夾個時間，詳細去討論點樣去開始，計劃十一月底前，有第一集出街。

https://forms.gle/JV457G8bcpvc41ty6