職場講講系列：就業技能提升網上講座
其實呢幾年嚟英國嘅朋友，經濟情況、英文能力、工作經驗都可能有好大分別，但以我哋了解，唔少人係搵嘢做方面都有或多或少嘅困難。有唔少港人組織都提供緊就業支援服務、協助大家提升就業技能。
今次我哋Hong Kong Aid 港援就希望重點地介紹4個職業嘅情況同搵工時注意事項，亦會有經驗分享。呢一系列嘅「職場講講」網上講座，如果你對嗰啲職業有興趣，當然歡迎你嚟聽啦，即使未必係你想做嘅，都可以聽聽，了解吓英國嘅職場文化、搵工小貼士～
一連4次嘅網上講座，時間都係英國時間7:30pm-8:30pm
3月22號晚：成為Interpreter第一步
唔少香港人嘅語文能力好好，有時候使用公共服務，例如GP時，你都會見到有翻譯，但係廣東話嘅翻譯質素未必真係咁理想...
可能你自己翻譯仲會好過佢
想幫到人，自己又可以賺到錢？你可以選擇成為翻譯！好榮幸，今次可以聯同僑福香港人及和福香港人合作舉辦講座，我哋嘅講者係註冊翻譯員，會同大家講解一下點樣成為一個註冊翻譯員。成為註冊翻譯員嘅下一步就可以幫到好多唔識英文嘅老人家，為佢地提供可靠嘅廣東話傳譯服務！！
3月25號晚：Care Worker 要做咩？
護理員係一個英國短缺工種之一，想知點樣成為一個護理員？究竟要符合啲咩資格，同埋當中嘅工作係點？等我哋為你一一解說～
3月27號晚：點止保安咁簡單
平時去超市／商場／唔同嘅地方，可能都會見到有保安嘅身影。究竟要喺英國成為一個保安，有啲咩需要注意？需要啲咩資格同埋經驗？保安其實都分好多種，絕對唔止係以前新年問你拎利是嘅保安咁簡單，等我哋講多啲俾你知！
3月29號晚：Food and Safety 證書考試雞精班
好多時候唔同嘅餐廳／食品製造工廠都可能需要Food and Safety嘅證書，其實呢份證書係咪好難考？想搵餐飲業嘅工作係咪就一定要有？好多問題，等我哋解釋你聽～
時間: 晚上7點半至8點半 (英國時間)
喺邊: Google meet (aka 你屋企)
對象: 需要搵工、想轉工嘅朋友🛠點報名？填好張form
https://forms.gle/myQZFwqJBtc3Ta2e8
如有任何問題歡迎pm我哋: tgid @katehkaid