放咗學呢段時間以嚟 - ngohaigeoihou

[emily]

放咗學呢段時間以嚟，一直以為隨住時間過去就可以慢慢適應返往昔嘅生活，但最後發現原來根本冇往昔呢樣嘢。打從離開嗰一刻開始，所有嘢注定唔會有原本。
//
仲記得放學嗰日返屋企，去到樓下居然唔識路，可能關我天生路痴事，但對於唔認得自己屋企條路呢樣嘢我覺得好心酸。去到而家為止，其實我都仲未認認真真咁喺樓下個商場兜個圈，之前聽家母講變咗好多，唔係幾想面對嗰種衝擊，所以我都係選擇逃避。
//
放學嗰日夜晚自己出咗去行下，可能對自己太有信心，一嚟就揀咗出曬名多人嘅旺角。其實一出門口嗰下就feel到瀨嘢，沿途一路都超多人超多人，仲記得喺地鐵站到見到好多人嗰下直頭個人震埋CLS，透唔到氣又驚恐好想逃離現場…其實去到而家都仲係好唔慣，只係開始進步到可以稍為掩飾一下內心嘅不安咁，但都呢一刻我仍然非常懷疑其實我係咪真係屬於呢個人類文明。
//
放學之後見到身邊人嘅生活都唔同咗，只有我一個原地踏步、甚至倒退，頂，嗰一刻我真係好想大大隻字刻喺額頭到，我係一擗屎。
//
生活上有好多嘢要追回進度，有好多嘢要繼續努力適應。但坦白講，我覺得自己做唔到但唔想其他人擔心，所以我好努力咁努力適應中。但我發現其實咁樣係一件好辛苦嘅事嚟，所以我都係放棄做陽光正面勵志好例子，放下負做下廢柴反而比較真實貼地。
//
啊，仲有。放學之後對接觸社運嘅嘢其實有啲陰影，所以當初都掙扎咗好耐究竟開唔開呢個ac…放學之後再望住其他人入學，原來成件事嘅emo程度係以前嘅唔知幾多倍。可能因為作為一個過來人但偏偏乜都幫唔到、而我又都算係叫做明白個痛苦喺邊度，尤其是我呢啲情感缺陷玻璃心脆弱撚，睇得越多越emo/_\不過又想嘗試為大家做少少嘢，所以最後都係喺不斷掙扎+友人半推半就之下開咗ac。算啦唉，其實本身都emo開，為咗其他人都冇乜所謂，同埋至少呢啲係我覺得有意義嘅事嚟。
//
入學呢樣嘢本身就好似武肺咁，出事當下冇乜嘢，但之後好返後遺症就一大堆。當初入學嘅時候喊都冇喊，而且迅速融入監房生活，我都對自己嘅適應能力同埋橫空出世嘅強大心臟感到震驚；反而放學之後諸多問題諸多不適應，講得難聽啲，我懷疑自己坐慣咗，罹患咗放學恐懼症。
//
其實有好多嘢都想講但偏偏個腦好似朝早條紅隧咁塞到係咁響安都搞唔掂，又有少少眼瞓…點都好，多謝大家俾我spam然後又咁有愛，句號衝去瞓覺先再見。

ngohaigeoihou