話說929當日俾人拉嗰陣

[emily]

有段故，可以同大家分享下。

話說929當日俾人拉嗰陣，個頭盔捱咗幾下棍終於頂唔住打甩咗，然後我就受到當頭棒喝，應棍倒地而下。媒體報道影到我頭破血流嘅畫面，一地都係血，都相當震撼㗎。當時網上仲不斷流傳該張相片，有啲又話我俾警察打死咗，又有曰我俾催淚彈射爆眼，諗返都覺好笑。

回歸正題，被捕過後要等佢哋登記呢樣嗰樣，中間有警察嘅急救員幫我包紮傷口。咁等咗一大輪，由金鐘道押咗返去警總嗰度，愈過得耐愈覺頭昏腦脹，咁就舉手同阿sir申請入醫院啦，再等分流上救護車，都已經好晏了。入到瑪麗醫院急症室，當熱心嘅護士姐姐幫我拆開個包紮嘅時候，我終於意識到原來頭暈又作嘔唔係因為失血又或是腦震盪，而係個頭俾人包太緊，屌。

咁爆咗頭，就當然要縫番埋個傷口，於是乎我就喺急診室度等醫生嚟。等待期間有幾個護士交頭接耳，然後同我講：「當值醫生今日唔喺度，會有另一位醫生嚟幫你縫針，但你可能要等多等。」咁我當時都冇深究啦，總之有醫生幫我縫針就可以。

喺醫院訓咗日，然後確定身體無恙後就要返去警署等候發落了。落到北角警署，又係漫長嘅等待，然後終於被告知律政司要控告我哋暴動罪，然後第二朝早要到西九法院上庭。難捱嘅十幾粒鐘過去後，終於押我哋上車去到西九。西九嘅臭格相當大，容納得哂我哋咁多人。控方趕住拉人上庭，根本預備唔切一次告哂我哋一百人所用嘅文件。是故原定朝早九點開嘅庭，押後到晚上先開得到。

中間漫長嘅時間，我哋一眾被告為咗解悶，唯有同身邊人互相認識social一下啦。我諗當日係西九臭格有史以來最熱鬧嘈吵嘅一日。咁我聽到政總嗰邊被捕有位係醫生，自然過去r兩句水吹。佢話我知，佢喺瑪麗醫院度做，我好奇再問佢係做專科定啲咩，佢答我：「我做急症室醫生㗎，原本嗰晚要當值添。」

估唔到，我喺瑪麗醫院錯過咗嘅急症室醫生，會喺西九法院臭格撞見返。世事就係咁奇妙。

故事就到呢度，希望佢平平安安，望鄭官從輕發落。

Choco Kiu Chun Chu