五味雜陳

[emily]

五味雜陳

13/7/2022

今次寫信主要都係講吓生活嘅二三事，第一樣嘢一定係30日內做3000下squat呢個goal終於完成！事源之前聽「強大人Get set Go」嘅人人瑜伽Section，佢哋講到一個小challenge，就係30日內做3000下深蹲，即係每日做100下做足一個月，而且每日100下唔係一次過做100下，而係得閒做幾十下，夾埋一日內完成100下。聽完之後自己又覺得好似試得過喎，當挑戰下自己都好呀。到早幾日終於完成呢個小目標（利申返我係好廢咁30 30 40下咁樣做，同埋好多時都自覺個posture唔夠正宗）

始終係會有種滿足嘅感覺，喺呢度嘅時間就好似進入咗巨型果凍咁，今日好似同琴日冇乜分別，聽日又好似會同今日冇乜分別，時間好似唔係向前流動咁，而我發覺為自己定下一個小目標好似可以令自己相對上motivated同埋察覺時間嘅流動，所以依家的me plan緊另一個連續30日做同一個運動嘅challenge, like連續30日做2分鐘plank？希望自己做到啦。

另一樣絕對要睇嘅必然係熱烈推介莊正嘅新album ‘Zing’。由於我本人實在太太太喜歡嘅關係，而且基於正嘢一定要開心share嘅精神，所以我一定要熱烈咁同晒所有人講莊正既’Zing’有幾正～事緣剛剛嘅星期日係「咆哮山莊」聽到’Zing’整隻專輯嘅歌以及訪問莊正有關album嘅創作經歷及意念，聽完我係要用震撼嚟形容，to be very honest，入咗嚟一段時間真係未試過喺電台聽歌聽到咁憾動到自己(not an exaggerated statement)，夜晚廿幾30度聽到我起晒goosebumps。感覺好似係自己去咗懸崖邊一趟，歷經一種情緒上拉扯嘅過程，繼而將自己一直以來嘅情緒傾瀉咁樣，係一種舒暢？係一種糾纏？係一種坐完過山車嘅感覺？我唔知，留待各位去感受。

最後一樣就係近排睇咗一本名為《最後的貴族》既書，作者係章詒和，一本比想像中好睇好多好多，睇到我嘩嘩聲嘅書。睇完真係覺得自己對中國嘅認識係少之又少，何其淺薄。好多時睇書都能夠令到我深深感受到歷史係何其之長而闊，世界係何其之大，而呢一種感受都令到我對眼前嘅現實相對上抽離，唔想自己太代入呢個牆內世界，有時我會諗點解好多人坐完監都好似冇對自己做錯過嘅事有任何反省咁？繼而even重投社會之後都不斷重複犯錯不斷出出入入監獄？近排我開始推論到其中一個原因，會唔會就係因為嗰啲人入到嚟就完全投入呢度嘅生活，將自己嘅精神同時間就全心全意投入喺呢度嘅人事是非，簡單來講即係將自己埋沒係呢種缺乏反省嘅監獄生活？講返本書先，當中精彩嘅片段實在太多太豐富，今次就抽頗有同感嘅一段分享。係筆者坐完10年監之後講及對坐監嘅體會，當中有一段是咁的：「有兩點來自對人的認識。首先，人是不能改造的。罪犯充其量只能做到遏制自己，即遏制犯罪本質。換句話說，人不是不想做壞事，而是不敢做壞事。另外，從前我以為壞人就是壞人，蹲上兩年大牢便明白一個人壞了，可以再壞，再壞以後，還可以更壞，壞是無底的。」

佢未睇呢本書之前，我一直都有質疑自己帶住一種有色眼鏡，甚至乎瞧不起嘅態度去面對呢度嘅劣質人士會唔會係一種歧視，一種不平等？始終呢種24/7朝夕相對嘅生活環境好容易放大人嘅壞？但原來對人嘅壞嘅感受唔單只係我獨有，筆者所提「壞是無底的」我係深感認同。我從來都唔會因為某人係在囚人士而有所歧視，而係從一個人嘅言行舉止已感受到一個人嘅壞，而壞係一種factual description (for me la at least)。不過講到呢度要quote翻一句近日喺雜誌睇到rapper JB所分享嘅一句說話”take your time to know. Waste your time to judge.” 一句幾impressive同提醒到我嘅說話，警惕自己面對着好多好多人嘅壞嘅時候，唔好只掛住批評同評論人地點點點，我會同自己講我唔想成為好似佢哋咁樣嘅人。同時要記住壞的確係無底嘅，但人嘅純粹、真誠同善良亦都係唔會打破想像的。

U上

walkwithu