鍾翰林於諾定咸612五周年集會發言

[emily]

鍾翰林於諾定咸612五周年集會發言


五年前嘅六月九號，冇諗過會有一百萬人走上街頭，記得喺六月九號之前，其實香港已經有兩次反修例遊行，第一次有三萬人，第二次都只有十萬人左右。

所以本身喺六月九號之前，一直諗住呢一次都只係得好少人參與，只係想憑良心行埋呢日，然後被政府無視612如期三讀通過，結果當日去維園，足足等咗四個鐘先起步到。

最後遊行都未完結，果然林鄭公開演說話已經收到市民嘅意見，但同時會繼續如期二讀，最終多個團體呼籲即晚留守金鐘，亦有好多嘅年青人選擇留低，好多人記得七月一號衝立法會，但其實當晚已經喺煲底嘗試衝擊同警察爆發衝突，所有年青人都係為咗香港嘅未來付出同奉獻。

當晚最後有數百名示威者喺舊灣仔警署出面被圍捕。當日我見到嘅唔只係香港人嘅憤怒，仲有就係香港呢片土地嘅希望。

由六月九號開始，我哋香港人喺一年時間入面和勇不分，走上街頭，抵抗港共政權。呢種團結，喺2014年雨傘運動以及2016年旺角年初一事件都未能做到，雖然隨住國安法實施，街頭抗爭絕跡，但我知道民主自由嘅種子，已經種咗喺香港人嘅內心。

我哋好清楚香港獨立係我哋唯一嘅選項。由一開始最多人嗌嘅「香港人加油」到「香港人反抗」再到「香港人報仇」，最終嘅係「香港人建國」。

最近好多組織者同我講，呢排啲遊行集會人數愈嚟愈少，可能係因為近日經常講嘅跨境鎮壓，又或者係慢慢融入咗英國社會，未必能夠再抽到時間。

但我哋當初嚟英國，正正就係因為受到港共壓迫，如果我哋屈服喺恐懼之中，就正中政權嘅下懷，呢件事就係佢哋想見到嘅事。

若然大家仍然有心，即使因為任何原因唔能參與遊行集會，我希望大家能夠思考除咗遊行集會，仲有啲咩能夠做到可以幫到香港。

喺白色恐怖時代，可能見唔到希望，但我希望大家都能夠繼續堅持，因為我哋香港人從來都唔係因為見到希望先堅持，而係因為堅持先有可能見到希望。

我相信終有一日，我哋會回到香港，履行同手足嘅約定，喺煲底除罩相聚。我亦都好希望，終有一日，可以見到真正代表香港嘅旗幟，喺自由民主嘅香港飄揚。