小弟喺本年初不幸染疫

[emily]

致我的友人們：

大家最近幾好嗎？喺不知不覺間已有半年有多嘅日子冇寫信比大家。所以今次就寫封信同大家報個平安及更新一下近況。

小弟喺本年初不幸染疫。但幸好冇得到重症亦係好短嘅時間內痊癒。都算係不幸之中嘅大幸。基本上身體都算係健康。我都有持續做運動。未見有太大嘅後遺（或者係我留意唔到）。所以都請各位唔需要擔心。但點解我會半年時間冇寫信呢。係因為小弟最近情緒都比較複雜。依半年都處於一種無限沉澱嘅過程。 有一啲事情發生咗令我用咗好多時間將啲負面能量解決咗佢。我又唔想將我嘅負面能量發放俾大家。所以就一直都冇寫信。現在一切都回復正常。我覺得依一刻嘅心情就好似放下咗一個好重嘅包袱再繼續重新出發咁。一個字“爽“！

其實我都係一個幾幸福嘅人。一路以來身邊都有好多人幫我照顧我。或者呢啲就係緣份。好想多謝一班仲喺我身邊不離不棄嘅朋友同屋企人。一班雖然我冇回信但仲keep住寫信比我嘅。一間無條件幫我配眼鏡嘅眼鏡店視點護眼 @ipoint_optical 。當然唔少得依一刻仲睇緊依封信嘅你哋啦。我成日都話要用心感受身邊嘅每一道微小。只要學識感恩。成個人都會更加正面。身處喺唔好世代就更加要學識保持正面。當然負面都要抒發嘅。但就要搵到合適嘅方法。請相信一切係最好嘅安排。我經常被其他囚友們問我點解成日都咁開心。無他。都係因為我嘗試令自己保持喺正面嘅思想。已經處於一個咁差嘅環境。如果連自己嘅思緒都咁差咁會好辛苦。

講最近嘅生活。其實無非係來來去去、重重覆覆、上上落落、跌跌碰碰。喺依種咁乏味嘅生活中值得一提嘅事我諗只得一件。機緣巧合下我喺幾個月前遇上我人生中第一位唱歌老師。我之前都有喺信度提及過出嚟之後想去學唱歌。冇諗到而家竟然可以提前學習。喺學習過程發現原來以前一直都用錯方式去發聲。亦唔識用正確嘅方式去呼吸。導致我咁耐以來一直都唱唔到歌。 我以前以為學唱歌真係學點樣唱咁簡單。原來係先要學習好呼吸、 肌肉控制、先再慢慢發聲再到最後嘅演唱技巧。正所謂學無止境。真係一日仲在生一日都仲有得學。我依家考慮出嚟之後好唔好去讀書。我都幾掙扎。因為到依個年紀先話要讀書都幾多嘢諗。又要諗錢又要諗前途。所以都好難下決定。

我諗大家睇到依封信嘅時候。我就剩低一百日喺呢度喇。講真我依家覺得啲時間好似蟻行一樣咁慢。每日打開眼都覺得距離終點仲有好遠。我知道係唔應該數日子。但就好似有種魔咒咁。好想拎張日曆出嚟數日子。真係一個惡性loop。 越近出嚟就開始有一種壓力。對未來未知嘅擔心越來越多。兩年喇。有時我會諗出到去我仲認唔認得啲地方。我以前都唔察覺到原來一個地方可以變得咁快。我以為只有人先會變得咁快原來唔單止。就係因為變得快所以我哋更加要珍惜眼前人同埋要活在當下。

呢封信應該會喺我依一百日內最後一封信。因為我想用多啲時間去處理出去要安排嘅事情及繼續我現時嘅學習。希望大家可以繼續等待。我哋好快就可以再見。相信久別重逢嘅畫面一定會好美好。我哋到時見！願大家平安、健康。Peace and Love

Lil Saiyan
18-7-2022

————————————

如欲與大耳成為筆友，請將信件寄到「尖沙咀郵箱98697號」，註明大耳收即可。

lil.saiyan