致 所有同路人：
當你們看到這個帖子時，我已經順利離開香港，到達英國開展新生活。
很抱歉，不能與所有同路人繼續在香港奮鬥。
這一刻的我只想離開這個是非之地，的確過去五年香港變化很多，我亦曾因為犯下兩宗社運案被判入獄及社會服務令。當我完成所有判刑後，我決定離開香港。
我認為香港是一個很難令我繼續愉快地生活下去的地方。我亦曾因為這些原因，而患下嚴重的抑鬱症。我相信我離開香港是一個很好的契機，令我身體回復開心平靜。
我決定由香港移居到英國做一個「二等公民」（自嘲），是因為我在香港感受不到我的公民價值。更甚是香港的人權自由法治被嚴重打壓。又或者咁講，政權真係好想我哋離開。就當係求仁得仁，我哋呢一班愛香港嘅香港人係唔會放棄，只是轉個身位在異鄉繼續努力。
No offence, 勿對號入座，果D笑9走既人係二等公民既人，我又睇唔到留係香港又有幾「唔二等」，純粹拎件事自嘲一下，唔係想分化同踩曬所有留港既人。互相尊重，去或留，沒有對錯之分；留低係更大勇氣，唔好笑9人，亦唔好屌9人。
事過境遷，我現在可以自由地道出，真正觸發我非走不可的原因。除了大家都知道的前區議員身分外，我過去的學歴是足夠令我在本地任教中四以下的學生，亦即是教育局的准用教員。今年三月中，我收到了一封由教育局常任秘書長寄給我的雙掛號信，下圖，内容大致係（中譯，有錯請指正）「翻查紀錄……你曾犯過兩宗案，有相關的案底及判刑……本局會重新考慮你成為教員的資格…」即係無話切切實實DQ你，但又隱隱晦晦咁留條尾，唔話個答案俾你知等你估，此乃其一。
其二是，我曾於離港前的數個月，兼職晚間工作。大老闆於我正式入職後，收到聲稱是國安的電話，內容大致係：「喂，呢排公司搞緊咩呀？有無請左邊個新人呀？唔好亂黎喎，做生意就繼續做生意…你明我意思嫁啦……」及後老闆都決定暫時唔請同路人住。呢件事都搞到我好唔好意思，我本身係好怕煩到人同埋搞到人。
其三是，大家在新聞，不論是公開定無公開的source，都一定知道，仍有很多同路人被打壓中，包括無理取消銀行戶口、取消專業資格，更甚的是人格謀殺。犯過社運案的人，即使無被起訴或定罪，他們都好似無辦法係社會重新上路，政權聯同所有大小公司機構，不斷扼殺所有你以為生存到的機會。有手足曾經係出獄後，難以重投社會，原因係某公司存在左一個審查制度。於我以言，一定係有好多人onlist ，爭在俾唔俾你知咁解。衰D講句，大部分有用的人，一係死左、一係坐緊監、一係等坐監、一係流亡緊……俾你好命坐完出番黎，呢個荒謬社會都係唔會俾機會你改過自身，重投正路。
綜觀幾點，我想講的是，紅加藍的大包圍打壓，係依然存在，只係你感唔感受到or你信唔信or你睇唔睇到or燒到你果疊未。佢地從無放棄過清算，無放棄過秋後算賬。思前想後，我認為無必要同佢係度浪費光陰。Be water, 你硬時，我淋；你強時，我弱。他自狠來他自惡，我自一口真氣足。
未來的生活係點，我無辦法保證。但至少我可以同大家講，我會盡全力繼續發光發亮做一個真正嘅香港人，將香港人好嘅一面帶去其他國家。
相信所有熟我嘅朋友都察覺到，我由五六月開始，不斷地約朋友親戚細佬妹食飯飲嘢敘舊見面，我唔想令自己太過唔捨得呢一度。但係亦都同自己講，我無辦法唔離開呢一度。離開一個三十幾年黎，讀書、生活、成長、工作，甚至乎服務過大家的香港大埔區，我希望我做呢個決定係正確嘅。
感謝過往曾經支持過及幫忙過（even鬧過）我的選民、街坊、好友、親戚、同學及其他香港人。
回想遺憾及可惜的事實在太多，包括未能一一向大家親身道別、未能再見同路人等。此外，我除了曾經是大家的代議士外，我亦是母校歌詠團的成員。今次匆匆一別，我也放棄了一個等待五年上台表演的機會，還望所有團員努力good show。以前，我成日以為上到台表演係理所當然，但到呢一刻先知道，原來有些事，真的不是必然……
祝福 所有 香港人
身體健康迎難而上
希望未來見，各人珍重﹗
願榮光歸香港﹗
文念志 IN UK
26-06-2024
PS此專頁不定時更新，不定時分享生活點滴。希望我可以開開心心咁帶住我個新粉紅色手袋周圍去遊歷
朋友提醒，政治野係呢度我會盡量少講
或者謹慎地考慮清楚後才諗下公唔公開講
君子不立危牆之下
Auld Lang Syne（友誼地久天長）中譯歌詞
//朋友個個握手 說祝福句 圍著唱歌
一起開心太多 要分開了 願莫忘我
可惜始終要走 何時可再 會面唱歌
跟你揮揮～手 說多一句 願莫忘我//
//朋友再見 聲聲往昔 歡笑來日記取
憶記舊日 情誼痛哭 歡笑在校園裡
一切別恨 離愁埋藏 心裡日後再追
一切歡呼 嘆息印於 心裡默默懷記//
https://www.facebook.com/mannimchi.page ... Ta94F4zBCl
支持《棱角 The Points》亂世求真，贊助我們運作：
