#CS2200260 作為一個公務員 想客觀分享下喺政府工作嘅感受

[emily]

#CS2200260

作為一個公務員 想客觀分享下喺政府工作嘅感受
當係圍爐 亦都想俾想入嚟政府做嘅朋友一個參考:)
首先好多人認為政府工係”鐵飯碗、薪高糧準、福利好、hea同冇嘢做”
等我逐個分析下：

1.) 鐵飯碗
的而且確，如果你過咗試用期之後，基本上你唔犯啲乜嘢大錯，要炒人嘅程序係好繁複，好多時上司寧願調走你就算。所以中年失業嘅機會係會低好多，如果做樓奴嘅人，打政府工真係好穩定，唔怕俾人無啦啦炒咗供唔起層樓。

2.）薪高糧準
出糧準時係正確嘅，至於係咪高薪，其實真係好睇吓你係做邊一個職系。ACO同AO比較，一個起薪點$15,950一個$57,395，當然入職要求差天共地，但數字上其實已經有一個好大嘅差距，所以高薪呢樣嘢並唔能夠以偏概全。稍為合理少少係同私人市場差不多工作性質嘅去做比較，一般而言專業職系的確係比私人市場好pay啲，但事實上所有比較都唔可能客觀，因為公共行政同私人市場，所做嘅嘢方針完全唔同其實係冇咩可比性。例如你係冇可能將一個消防員嘅工作同一個賣寬頻電話嘅sales作比較。就算喺市人市場，你都唔會將LV嘅sales同H&M嘅sales做比較。

3.) 福利好
以前有長糧係幾好嘅，而家新入職嘅只係得返公積金，新症牙科聽聞入職咗兩年都仲未排到期。相反私人市場好多都有group medical，一個傷風感冒去睇GP都有得claim，有啲仲可以有埋全球保障，私下去旅行都包。仲未計MNC有wfh, hybrid working等等flexible working arrangement，不過香港依然係以中小企同港資公司居多。

4.)Hea同冇嘢做
呢個應該係最大爭議，亦係好多人嘅誤解。都係嗰句，首先要睇職系。一個二級工人同運輸主任嘅工作量已經係好唔一樣。當然我唔排除有啲職位係真係比較少嘢做，但大部份前線工作嘅人，特別係中層管理層嘅人，其實工作量可以比私人市場更多，不過叫做份糧包埋。但係如果真係想入嚟政府做嘅，千祈唔好抱住唔使做咁on9嘅心態，否則你會好失望同覺得好震撼。

最後有幾個observation俾想加入嘅人睇：

1.) 政府而家嘅流失率同空缺係好多
因為退休潮同埋移民潮，其實政府走咗好多人，而政府請人嘅速度係非常之慢。好多人其實一個人做緊兩份崗位(double sideway, double up/down)。加上市民對於政府嘅期望越來越高，喺人手不足嘅情況下其實工作越嚟越辛苦。工作辛苦時，政府嘅福利如上述講越來越少，過去三年加得2.5%都仲要俾人鬧。變相越來越多人入職唔夠半年覺得性價比唔高就走，促成左一個惡性循環。所以你入嚟做，一定要抱着最壞嘅打算。

2.) 工作環境差
要知道其實政府好多部門已經成立咗好多年，有啲office已經日久失修。雖然都有唔少嘅新嘅政府大樓落成，但係舊式office依然佔最多，就算新嘅大樓落成咗，地點通常好唔方便。殘舊嘅程度例如廁所可以差過公廁，office地氈嘅漬可以污糟過酒樓，你用緊嘅工作枱要用封箱膠紙痴住先用得。如果翻開甲級寫字樓工作嘅人，我相信入到你政府一定會覺得好震撼，成件事好似返返去丁蟹年代咁。另外就算政府話要推行ERKS，其實paper filing依然係主流。你自己諗吓，又想工作效率提高，但配套又配合唔到，你覺得有啲咩方法可以meet到KPI？就係無償OT。

3.) 流動率低
上面講咗公共行政同私人市場某程度上冇可比性，基本上你預咗一入去就出唔返嚟，因為你嘅工作經驗私人市場係唔會認可。唔認可嘅原因，最主要其實來自於對政府工作嘅唔了解，特別係非專業職系。普遍嘅人都認為政府係hea，但事實上並非咁樣，但已經根深蒂固嘅想法係好難改變。而咁低嘅流動率係會引致好多問題，例如只要你俾上司寫死咗你嘅report，你想走又走唔到，到時你每一日都會覺得好似喺地獄工作咁。
講咗咁多，咁究竟入唔入嚟做好？呢個問題其實好需要你去客觀評核自己嘅能力。如果你覺得自己係人中之龍，又或者嚮往自由嘅工作環境，誠心勸你千祈唔好入政府，否則你會後悔一世。反之，如果你係可以將生活同工作可以分得好開嘅人，唔求搵大錢只求穩定，對工作內容又冇乜特別想法嘅人，咁你可以試吓。