【教育局批為學童在烈日下請願心痛 溥仁家長：點解見佢哋辛苦你唔收信】

[emily]

【教育局批為學童在烈日下請願心痛
溥仁家長：點解見佢哋辛苦你唔收信】

面臨殺校的溥仁小學家長及學生星期六去請願，被教育局局長蔡若蓮拒見，家長朱太今朝在881烽烟。

主持：殺校對你有乜影響？

家長：我小朋友讀緊小一，衰啲講句仲有兩年讀，我不是最大影響，但其他小朋友今年已冇書讀。

主持：當初點解揀溥仁小學？

家長：我的小朋友有特殊教育需要（SEN） ，我問咗十幾間小學，得呢間由SEN小組主任覆，由小朋友幾時確診、嚴重程度逐樣問，講點樣畀佢融入主流學生。我小朋友由唔肯返學做功課，而家主動答問題，老師用大半年時間幫佢哋，教家長屋企點幫小朋友。校工姨姨認得每個小朋友的家長，見我小朋友細粒但書包重就幫忙。一間咁好的學校要消失，係好多學習唔係好叻的小朋友嘅損失。

主持：點解烈日當空去請願？

家長：我哋想同局長會面，佢出來噓寒問暖、假意收我封信都好吖，但佢只派了一次九龍城分區官員出來，其他係佢助手。點解我哋唔入去，因為想有傳媒在場，淨係得我同你哋，講過乜冇人知，都唔透明。

主持：教育局話對被帶上街心痛？

家長：易地而處，如果你係父母，你真係咁心痛，點解你等到在office涼住冷氣講呢句說話，而唔係是當時見到戥小朋友好辛苦，快啲收咗封信再同家長約會面時間，而係靜靜雞走咗去？

主持：再會有請願行動嗎？

要同其他家長傾，但唔會停步。早兩日咁熱，小朋友係咪好辛苦，小朋友去公園玩到濕晒，你唔覺得辛苦。呢班小朋友好辛苦，我作為母親一定會比其他人痛心同肉赤。

______________________________

溥仁小學校友校董及校友會主席彭少芳其後烽烟。

主持：請願時有乜期望？

彭：溥仁小學十幾年前已有融合教育，近年多了SEN學生，佢哋好辛苦入到主流學校，點解教育官員唔諗點解呢班小朋友行出來，點解你唔出來了解佢哋要點照顧？

主持：爭一個位有可能解決嗎？

彭：教育局話未達標就未達標，但有小學持續收生不足卻可以開綠燈，家長知道後好氣憤，先有星期六的行動。我哋疫情時無法宣傳或畀人參觀，希望教育局延長收生時間，但佢哋冇回應，校友會希望用籌款申辦私立小學。