五月過完，又少一個月喺出面無所事事了。

[emily]

五月過完，又少一個月喺出面無所事事了。

前排讀完一本叫「東京百景」嘅書。本身喺誠品睇到嘅時候以為呢本會係介紹日本嘅書，冇點諗就買咗，但睇過先知原來係作者自己喺東京打拼嘅故事。作者係一名搞笑藝人，十幾歲由大阪到東京讀書、打工、同追逐夢想。書入面嘅故仔全部都係啲好平淡嘅生活瑣事，但睇完又覺得幾精彩。

睇完之後突然間諗，好多書都有寫過「東京」呢個地方嘅魅力。佢吸引日本年輕人到東京追逐夢想，有人成功，亦都有人喺東京夢碎，用唔同嘅形式離開東京。但無論點，日本人對「東京」又或者「日本」都好似有特別嘅情意結，可以寫出好多引人入勝嘅故事。

又諗返香港。其實香港好多人都努力生活，亦追逐夢想，但呢幾年大家好似好辛苦。由自己狹窄嘅視野望住呢個香港，發現好似喺香港打拼係一件不切實際嘅嘢，突然間好似唔能夠好坦然咁講「就算失敗，但至少我喺香港打拼過」

最近間唔中會諗，好似就嚟要有個案底在身，兼幾年後先可以重新開始努力，究竟人生至今二十幾年努力讀書之後返呢三年工係為乜鳩；但最近同朋友傾計，佢講咗句嘢幾有道理，「always plan for the fact that nothing ever goes according to the plan」

我估四年前嘅自己都唔會預計自己會畀人拉。亦都唔會估到自己大學四年讀嘅嘢一啲用都冇，而家返工竟然係靠中學學過嘅嘢。人生的確變化無常，永遠都預計唔到之後發生咩。引用本書入面一句，「即使是痛苦到想死的夜晚，我還是相信這是好事即將發生的前兆。我就是為了不錯過那個瞬間而繼續活著。」所以目前可以做嘅，就係學多啲自己想學嘅，之後認真咁活下去。

大家都要好好咁活下去

——寫於一個咩事都冇發生過嘅日期前

ksleaving