李慧琼回應民主派要靠自己搵提名參選區議會，佢話三會委員嘅資料唔難搵，一定有辦法接觸提名人

[emily]

尋日李慧琼回應民主派要靠自己搵提名參選區議會，佢話三會委員嘅資料唔難搵，一定有辦法接觸提名人。

於是今朝881晴朗嘗試根據民政事務處嘅九龍城各分區委員會名單，五個分區加埋有百幾個委員，全部只得姓名，冇任何職銜同聯絡方法。

主持嘗試聯絡每區第一個委員，用Google搵到龍塘區王恭浩係尖沙咀獅子會成員，可以打去獅子會搵佢攞提名；再Google到土瓜灣區文詩詠係英文小學校長，可以打去校務處搵校長。

紅磡區王漢杰出現多個Google搜尋結果，有個係東華三院總理，有個係堅尼地城西醫，仲有個歷史人物參加過革命，你連到底要搵邊個提名都唔肯定。

最高難度係啟德區于蓉女士，主持只搜尋到一個同名嘅新疆醫生、山東經濟學博士、四川大學華西醫院醫師，但就冇一個結果係嚮香港。