成功獲批難民嘅您：恭喜你，終於都等到呢一日。不過，開始新生活都會有啲挑戰。如果你唔太清楚有啲咩嘢權利，或者唔知應該做啲咩嘢先，可以同我哋傾傾；如果喺讀書、搵工、搵屋上有困難，都可以搵我哋傾吓，我哋可以提供適切意見同分享經驗。有需要嘅話亦可以為你轉介或者推薦啱你嘅服務，我哋亦都會繼續發展服務香港難民群體嘅計劃。
收到拒絕嘅您：可以灰吓但唔好絕望。根據我哋現有處理緊嘅個案統計（因為官方未出今年最新嘅數據），6月至11月間獲批核嘅香港難民佔比係處理個案當中嘅大約六成，呢啲獲批核嘅香港個案亦都有利於其他被拒個案嘅上訴。而我哋檢視嘅絕大部分拒絕個案當中都係因為內政部翻譯人員未能準確翻譯（例如混淆Bailed同Released)、負責審批職員忽略提交咗嘅證據同埋未有詳細敘述迫害細節等。呢啲錯漏導致嘅拒絕可以透過上訴提出，暫時喺我哋現有服務使用者入面未有人喺第一次上訴中失敗。
對於不幸被暫時拒絕嘅你，相信被拒絕之後面對最大嘅問題就係冇律師協助上訴。我哋有唔同嘅服務去協助你面對暫時被拒絕嘅狀況，喺我哋由政府資助嘅法律服務方面，喺符合Legal Aid申請條件下作為上訴申請嘅法律代表。
想另外搵律師提出上訴又驚趕唔切14日限期？我哋都可以提供免費OISC認可嘅提交上訴表格協助。我哋亦未見過有遣返香港嘅案例，仲有好多出路，唔使太擔心。（不過時間都幾緊迫，千祈唔好拖，亦唔好搞到overstay啊！）
剛收到面試通知嘅您：如果你唔知應該要留意啲咩，都可以問問我哋架！了解吓面試前應該有啲咩嘢要準備、面試期間有咩權利、面試後要做咩同點樣可以面試時有效表達自己。預備得充足啲，咁樣就令你更有信心迎接面試；）
總之，你唔係一個人㗎，如果有咩需要，隨時同我哋聯絡，我哋會盡力提供協助同建議。如果大家留意到有尋求緊庇護嘅朋友唔知點算，亦都請鼓勵佢哋聯絡Hong Kong Aid 港援。
Telegram：https://t.me/hongkongaid
電話：+447377765552
電郵： [email protected]
https://www.hkaid.org.uk/
註：我哋提供嘅服務均會遵守保密原則及英國法規。
