10月1，名為國慶，實為國殤。

[emily]

Somebody 佚名


10月1，名為國慶，實為國殤。
一個趁國民黨抗日發動內戰奪取政權，剝奪人民自由權益，草菅人命嘅政黨，又有咩資格要求佢從未擁有過嘅地方—香港去慶祝國殤日？
當日，我哋喺支那領事館門口，透過破壞五星紅旗嘅行動，宣告香港人對支共嘅反抗。即使身處加拿大呢個被譽為左膠集中地嘅海外地區，其實仍然有香港人心繫家國，願意踏出一步，以行動表達我哋對共產黨反人權，反民主嘅仇恨。
支共係一個形式主義嘅政體，對象徵物諱莫如深。現時香港已然淪陷，每日洗腦宣傳，強逼愛國；通街掛滿五星旗，甚至驅趕為南丫海難燒衣嘅死難者家屬。港共不停「去殖」，意圖洗走香港所有與殖民地有關嘅歷史象徵，包括要求刪除於香港法律內已經無效力嘅殖民地字眼。喺19年7月21日上環嘅遊行，對中聯辦嘅支那國徽潑墨成為當日焦點，而當日亦係運動期間首次廣泛叫出《光復香港，時代革命》口號。可想而知，光復香港，就係要同共匪誓不兩立。
國旗/旗幟可以代表一個族群，破壞共旗係要話俾大家聽支那唔係我地嘅國家，並唔能夠代表我地呢個民族。面對支共嘅壓迫，我地選擇反抗。燃燒或者破壞國旗，係一種言論嘅表現。美國嘅最高法院曾經裁定焚燒國旗為一種言論，受言論自由保障。故此，支共大肆揮舞五星旗慶祝其國慶，我地就要行使言論自由，塗鴉破壞，賀佢老母。即使國安法全球通用都好，我哋並無需跟從；因為支那並不是我哋嘅國家。
此外，支共持續壓迫西藏、東突厥（新疆）、台灣以及香港所有支持人權同言論自由嘅人；離散各地嘅港人以及其他被壓逼族群都有一份責任珍惜自由空氣。我哋當日僥倖逃離，更加有責任去無法公開發聲嘅牆內手足，同埋仍然於香港嘅有志之士表明志向。因此，我地和應各地抗共組織嘅行動，破壞代表支那嘅五星旗，表達香港人同其他被壓逼族群一樣，與支共不共戴天。
破壞共黨標誌嘅旗幟雖然只係象徵式嘅行動，但係都代表Somebody會繼續嘗試用唔同嘅方式去燃點海外抗爭意志，更會努力將群眾嘅力量轉化為更活躍及直接嘅抗爭行動，延續2019年光復香港嘅道路。有唔少人依然認為抗爭「唔好激親共產黨」，導致行禮如儀嘅流弊。有見及此，我地希望透過塗鴉破壞五星旗，邀請同路人打破自我噤聲嘅思維，並且認清自己對「香港人」嘅國族認同。可能呢個行為對於我哋呢d經歷過香港革命嘅人嚟講根本不值一提；但對於離港多年，但仍然關注香港新聞嘅同路人（即係我哋口中嘅老華僑/CBC）甚至一d「和理非」嚟講，接受破壞國旗呢樣嘢已經係一個挑戰。不論大家能否接受呢個行為都好，至少我哋成功令大家思考。
要光復香港，反共係必然嘅心態以及共識。無論係香港本土還是海外各地例如倫敦溫哥華，都不約而同地有毀壞中共國旗國徽嘅行動。香港人必須牢記，支共永遠係光復香港路上最大嘅敵人。雖則海外活動都可以有不同嘅面向，無論係團結社群、保育文化、游說工作、和平集會、針對外宣示威等，但每次行動必須有清晰目的，避免為做而做行禮如儀，先可以為香港獨立打好根基。
（圖片來源： 自由亞洲粵語 RFA Cantonese ）

https://www.facebook.com/somebody.hk?__ ... UC%2CP-y-R