「高級兩餸飯」

[emily]

又中環實時。在疫市中崛起的「#兩餸飯」，發展至今已登大雅之堂，中環金融人必叫，應該趁個市旺，整間叫Loong Rice。

睇新聞報道，經營者從只求平租舖位，變成追尋適合地點落腳，上班族聚集的中環及銅鑼灣也成為了心水之選。即係翠華2024。

在中西區打滾多年，近一兩年只知平價岱民同中價添飯餸定添餸飯，之前都寫過Tim This Rice，實而不華。但 #北冰洋 就真係唔識了。

而呢間「高級兩餸飯」最近也以每月20萬元，承租中環德輔道中141號中保集團大廈地下B1舖，平均呎租逾220元。

我當50蚊個兩餸飯，每個月20個港股交易日，或銀行開嘅日子計，即係每日要賣出200客飯？咁難唔難？即係每日一皮，食晏一個鐘出100份。有冇計錯？

據悉，該舖原來總面積達3,805方呎，由花旗銀行以月租60萬元承租多年。

講起呢個舖位，我早幾年在中環返工，都成日經過，花旗租開好似中間有翻新同租多咗舖面。

當然冇畢打街花旗銀行咁標誌性，咁但，最重要係都曾經服務上環一帶打工仔，仲記得有朱千雪個廣告添，唔係林明禎呀。

所以個報道冇錯，個地舖原為德輔道中141號中保集團大廈地下B舖，位處中環中心及IFC兩大甲廈中間，聚集大量區內上班一族。

對面機利文/新街大把午市人流。所以，都唔使擔心圍唔到數的，驚夾唔切餸好過。人龍分分鐘排到去隔幾間啲滙豐ATM機。

而睇政府數字，高才通加上經其他人才入境計劃獲批的申請，由去年至今總計約108000名人才已抵港，斷估應該都有七成人係做金融？香港好似都唔夠三十萬個金融從業員。

高才通計劃估計可為香港帶來每年約340億港元的直接經濟貢獻。即係每日1個億喎，再多嘅兩餸飯都食得起。唔使上小紅書呻話香港食窮人。

係唔知原來個業主在花旗銀行遷出後，將舖位分間成3間細舖，其中獲北冰洋兩餸飯垂青的B1舖位處單邊，人流較多，建築面積約900方呎，叫價25萬。

B2及B3則分別叫租10萬元及28萬元。我諗都係些乜奶物茶之類？可能飲料股上市前做下招牌門市咁。

北冰洋兩餸飯於疫市期間，在荔枝角工廠區經營，最平36蚊可食「兩餸飯」，及後進軍上環區開店，好勵志。幾時上市？