差不多19個月既時間

[emily]

差不多19個月既時間，1年7個月，不知不覺間過左。時間呢樣嘢真係好相對，每個人對時間流動既感觀都可以唔同，甚至同一個人係不同時間點對時間流動既快慢所感亦都可以不同。而我面對住未過既時間總是覺得好漫長，但到原來已經過左1年7個月後，我有種「究竟呢段時間我做左乜春？」嘅感覺。坦白地講我冇覺得自己知識增長上突飛猛進左，亦冇覺得自己對世界既認知深化左，更甚既係我冇覺得自己成長左好多，但19個月就係我眼前流走左。

原本都冇諗住做咩回顧，但睇左其他人做既小記後，我更加覺得自己有需要記錄一下當刻呢個時間點，入左黎差不多19個月既所思所感。作為一個比較sentimental同sensitive既人，呢段時間既情緒經常如瀑㳍般傾瀉，所以如果不作一個階段性回顧，我怕自己將來望返自己逗留係呢個地方既時光會係一片空白，會再次出現翻「我究竟做咗乜春？」呢個問題。

而呢個回顧主要既命題係「滯留」呢2個字，因為近日意識到原來人唔單只可以好explicit地滯留係一個地方，更加既係滯留係一段時光，亦即係記憶。入左黎之後可能因為多左時間同機會面對自己既思緒，繼而發現原來自己都有partly停留左係3年前，包括不受控制地呈現眼前既清晰畫面，包括各種令我想痴線大叫既後遺情緒，亦包括不能抹掉既愧疚感，原來係唔會因為我坐監而消失。

近排都睇到唔少人提及停留係 2019年而失去自己生活甚至人生呢個問題，但我會認為究竟牢牢記住2019其實係咪必然壞事先？當然我指嘅並唔係單純高舉創傷，傷痛，我相信2019年帶比我地嘅遠超於此，牢牢記住嘅原因除了要記住當年嘅決心與勇氣，更重要嘅應該係對當年每一步嘅反思與檢討，方仲賢早前接受嘅訪問寫得好好，我覺得每個人（絕對包括我自己）都需要反思自己其實可唔可以做得更好？ 有咩係我地唔應該做？ 有咩係我地應該做但無做？ 而唔係依家咁空白化當年發生左嘅事。

近排係903聽到一個艾粒show promo, 講到呢 20年嘅回憶，其中關於 2019年個段竟然係深呼吸嘆一口氣之後講咗句 「仲要講呀？」 其實我唔明白咩叫「仲要講呀？」 正正係因為好多人每當提及2019年都空白化、去內容化、真空化，我地更加需要將呢段記憶牢牢記住，不過當然亦都相當視乎如何帶住呢段記憶與及對其反思所得而負重前行，絕非希望如同陷進泥濘一樣沉溺於過去，不過我亦明白其實我自己無資格講呢番説話，因為我無法體會每個未能move on 嘅人所受之困苦同難處，亦都明白由上而下嘅壓迫所帶來輾壓式恐懼，實在唔能夠要求其他人點點點，只不過我真係非常唔希望見到 2019成為一段不可言喻嘅空白，而係一段能夠帶我地向未來行得更遠嘅過去。

套用早前係明報《星期日生活》睇到戈爾巴喬夫所講過嘅一段説話（希望我無記錯啦），希望並唔係盲目地認為眼前所有就係最好嘅，而係即使面對住成蘿爛橙都不低頭，選擇去改變個世界 （用我嘅interpretation啦hahahaha）

Ps講下無聊嘢先，近排聽收音機聽到yosobeit放題勁開心，播咗半個鐘一連 4首歌，聽到自己想聽嘅歌真係好似中咗獎咁，係度趁機做下promotion先 XD
開心 share 下其中一首我好鐘意嘅歌，係《秋分》 from Yosobeit
(又多左一個原因鐘意秋天，電台會因為近排秋天而播多咗《秋分》)

//零碎沙丘 記錄了沒法避開的荒謬
缺憾裡埋沒出口
如此劫數道盡沒遺漏
窩心的過去若然
清清爽爽瀟瀟灑灑去
漠然地徹走//

walkwithu__