十月天，但依然好似有十個太陽噉

[emily]

十月天，但依然好似有十個太陽噉。喺屋企披住半濕嘅祝君早安同埋著住喺監獄收嘅私家底褲（冇圖），冇開冷氣吹住風睇緊書，突然發覺生活同以前在囚時都有啲相似（連本書都係喺監獄帶出嚟！），又諗起以前嘅消暑方法，順便分享一下。

消暑不外乎都係水冷風冷，尤其係水冷更家有效，所以夏天時囚友都經常沖身（唔好問點解成日有得沖身），沖走黐笠笠嘅不適之餘亦可以幫身體降溫。

除此之外，利用蒸發降溫亦不失為一個好方法，我自己就喜歡喺風扇下用濕毛巾繞住條頸。頸有好多血液循環，而血液嘅其中一個用途就係傳遞身體嘅熱，所以能夠幫血降溫就可以均衡地幫全身降溫。將濕嘅冰巾披喺背上係唔少人嘅做法，但散熱效果冇繞喺頸上嘅好（不過繞住條頸係冇咁舒服）。記住喺毛巾或冰巾變熱變乾時就要換返啲凍水，否則就變成保暖。

盡量唔好用爽身粉同止汗劑（在囚人士可以用人工買止汗劑），因為哩啲嘢阻止汗水蒸發降溫，雖然用咗係一時舒服，但只會令之後更熱。當然有其他皮膚問題如濕疹就另計。

喺消暑方面男監比女監應該好唔少，哎！希望大家係喺自己屋企用得著哩啲方法，開少啲冷氣（冷氣只係「抽熱機」），令個城市熱少些微幾分，在囚嘅人都再熱少幾幾幾分。

FAQ: 喺入面係咪真係好熱/ 熱得好辛苦？
Ans: 熱唔熱哩家嘢好主觀又睇體質，或者你試下唔開冷氣感受下都得。

defendant17th