《壁屋遊記2奢侈品》

[emily]

《壁屋遊記2奢侈品》

由於還押嘅細節眾多所以我留待之後整合。
———————————————
咁我哋就連續兩日喺醫院嗰度檢查，之後我哋就被轉移咗去隔離期數B5(隔離21日)我去到嗰度嘅時候，第一眼見到嘅就係一個面目凶狠嘅阿Sir其後望入去活動室入邊就見到四至五個囚犯。入到去嗰陣阿Sir教我哋隔離期嘅牌頭(規矩)，然後就問我哋有冇跟人同埋衰邊瓣。佢得知我哋係暴動仔之後就免不了一大輪嘅說教。

入到去活動室我被安排，我被安排坐到一個古惑仔嘅身邊，而事實上佢嘅外表亦都同古惑仔嘅既定印象相符，紋身由腳包到上頸。經過幾番交談之後我得知佢個名叫做阿輝佢衰自稱三合會，而出乎意料嘅係佢比我所認為嘅古惑仔更通情達理同友善。

其後一天嘅過去我都認識到唔同嘅人，有外籍黑人佢衰盜竊冇錢交保釋金，有一個17歲不善言詞嘅高佬佢收一萬蚊走去幫人收1.5kg白粉嘅郵包，仲有一個喺衰詐騙，但即使如此一日相處落嚟佢哋都冇乜嘢大問題。就一齊瞓覺直到第二日。喺瞓覺之前我都向其他同囚詢問入到嚟開始幾時先有人探，而佢哋都幫我計過由入名開始大約係明天屋企人就可以探。

由於還押人士嘅探訪時間係上午，所以我第二朝嘅早上一直都坐立不安喺度望住門口有冇四手(負責帶囚犯移動嘅懲教職員) 入嚟嗌名探訪，九點10點11點都有人被嗌出去探訪，但唯獨係我仲未有。隨着時間嘅過去，我個心就越嚟越忐忑。當我準備放棄期待嘅時候，我突然聽到 :「xxxxx-21探訪！」我聽到嘅時候即刻對一對牌仔再答覆阿Sir，而我去到探訪室嘅時候都喺度猜想係邊一個探我，當其時除咗屋企人之外我更加想見到女朋友。

叫到我號碼嘅時候我就被安排到坐喺一塊玻璃面前，而玻璃之間亦有數條鐵柱去等待探訪者嘅來臨。謎底終於揭曉，映入眼簾嘅係滿面擔心嘅父母，雖然我女朋友冇嚟到但係我都會好好把握呢15分鐘，而隨着名為時間嘅漏斗開始倒轉，我母親嘅表情由擔心慢慢轉變成淚流滿面，而我都不斷安撫佢哋嘅心情同交帶低我希望佢哋幫我處理嘅事。

但漏斗頂部嘅沙總會有流空嘅一日。由電話冇聲嘅一刻，你就知道今日之內就冇辦法再見到你嘅屋企人。當初習以為常嘅相見，喺牆內都會變成一種奢侈品。我中文唔好但情況大概就係「親欲見而子不在」。

而我被帶到返活動室嘅之後我有聽到有阿Sir嗌我個號碼，當時我懷着疑惑嘅心情走出去，隨即我收到嘅係一封寫住「XXX先生收」嘅信件。

待續

hk_toyjailo