終於過出嚟第一個中秋節

[emily]

好多人都同我講，終於過出嚟第一個中秋節。星期日打咗呢篇文。有啲感情始終都要抒發。
To：我愛的香港人：
今日是追月，過了今晚就過了小弟三年來期待已久的中秋節。相信有追開小弟文章嘅朋友都知道，中秋節係小弟第二喜歡嘅節日。因為代表着團圓、又熱鬧、本來唔會一齊嘅人都會因為中秋節而食一餐團圓飯。諗返起，有記憶嘅中秋節已經只係得返一九年一個。當時一大班人好開心，雖然大家相識嘅時間唔來，但係就好似已經識咗10年咁，一齊嘻嘻哈哈，一齊食月餅，整蠱大家，玩到日出為止。當時心諗，就算唔成功至少日後都可以一齊咁樣過中秋節。不過事與願違。原來三年之後嘅中秋節再唔係之前想像中嘅一樣。入到公園，大家依然會坐埋一齊食月餅玩燈籠，公園依然人山人海非常熱鬧。但係熟悉嘅面孔已經再唔喺身邊。冇咗大家一齊圍圈唱歌，冇咗激光匯演，冇咗⋯可以直接望見對方樣貌嘅時光。係入去之前，每逢中秋節依啲節日小弟只係WhatsApp send「中秋節快樂」，都要send 6、70個。今年，竟然連10個都冇。原因係，出返嚟之後少咗九成嘅朋友，有啲只能夠透過書信傾偈，有啲完全消失咗，有啲仲未瞓醒。老實講就算大家都仲認為大家係朋友，三年冇講一句說話，依句「中秋節快樂」唔通仲講得出口？節日依然，但係關係已經唔同。
最記得有一年嘅中秋節，小弟有親戚得重病，有一半嘅屋企人返咗鄉下，嗰一年嘅中秋節淨係得返我同埋家父。雖然嗰晚食得好豐富，但係行入公園見到咁多個小朋友都嘻嘻哈哈成班人玩，我就剩係得自己一個，忍唔住喊咗出嚟。呢種本來要熱鬧同埋團圓嘅節日，最討厭係身邊冇人。喺入邊嗰一個月餅雖然淨係白蓮蓉，但係成班人一齊食感覺上佢特別好食。出返嚟，乜嘢月餅都有得食，個味道就唔同咗。呢兩日每逢望向頭頂嘅月亮，忍唔住諗身處異地嘅各位究竟而家喺到做緊咩。話就話大家喺同一篇天空望住同一個月亮，係好浪漫。咁點？對比起依種浪漫我不如要溫馨，大家喺大家隔離唔需要講呢一句說話仲好。大個仔，唔會再行入公園見到大家嘻嘻哈哈而自己喺到喊，不過討厭大家唔係隔離呢回事永遠都唔會變。出嚟之後見到好多同路人整嘅月餅，大家都寫上團圓嘅句子，都係嗰啲「天各一方一齊望住月亮」⋯求其講一句都係。不過依種心情唔係食個月餅望個月亮就可以解決到，至少，已經再過唔返之前嘅中秋節。未來嘅中秋節，相信會越來越少人一齊過。唔想個結果係咁，但有陣時總要有心理準備。喺一九年就係太天真諗，之後大家都可以一齊咁樣過中秋節。
呢兩日諗得最多嘅一句說話「我地係咪冇可能再一齊過中秋節？」。呢句說話冇對象，就係不斷咁諗。我都唔知道究竟係問緊邊個，只係覺得好似有啲人喺我前面，而我，向佢哋問呢句說話………

尚千赴戎
木何懼火
11-09-2022

words.beyond.wall