奮鬥
致親愛的家人、朋友與弟兄姊妹們︰大家好嗎？唔驚唔覺又過咗一個月，牆外嘅您哋過得如何？我終於都渡過咗最繁忙嘅5月，兩科大學功課同考試都終於攻略完畢，對於依兩科都大課程我會建議牆內嘅朋友真係要考慮清楚先好報讀，因為Tutor好嚴格（亦可以講佢哋嘅要求好令人摸不著頭腦），而因疫情關係，Tutor係唔會係考試之前入嚟同學生溫習，所以所有嘢都要靠自己自學同理解，明就明，唔明就唔明，依兩科都會大學學科︰一科係FIN B280 Introduction to Financial Management；另一科係MGT B398 Business Strategy，各位牆內嘅朋友要注意喇！
上個月5月20日，我突然過界去壁屋，嚟唔切同朋友道別就要離開，人生就好似蒲公英一樣，好多時都唔會知道幾時同埋會飄去邊度，好多嘢都唔可以掌握係自己身上，過界當日，我擔挑住4袋總共約50 kgs嘅行李（因為多書，所以好重），左手拎住結他，就係咁上路，好好釆，壁屋監獄嘅生活同環境都比石壁監獄好。而我亦好快跟依度嘅囚友打成一片，我依家嘅倉入面有好多外藉人士，而因為時間多咗，開始努力學習日語同越南話，現時進度︰日文已背好平假名；越南話已識讀1至99，發仔（魚蛋時期手足）講得好啱，監房係學外語嘅好地方，出返去，相信會無咁多時間去學習同埋休息，Too many plans, too little time，要珍惜光陰，不要拖延，抵達成功，來自堅持同紀律，係注重速度同效率嘅現代社會，好多人會認為“選擇比努力更重要”，但係點解轉職者多，成功者寡？因為「成就」彷彿物理學上嘅臨界點，物質要到達一定嘅溫度同壓力先會變質；人則要經過磨練，先得以成長同蛻變。所以各位朋友亦唔需要停留係「無力感」，依種太浪漫化失敗事實嘅情懷之中，請保守好您嘅心，令我哋能不斷係社會中散播祝福，使更多嘅生命遭遇正向嘅改變，而快樂亦可以好簡單，日子過得可能好平凡，但試下感謝每日以為“理所當然”嘅事，我哋會從中搵到越嚟越多嘅幸福，因為一個人透過感恩建立正面嘅心情，腦神經迴路都會強化，繼而加強對快樂感覺嘅連結。
謝謝我嘅家人、朋友、教會弟兄姊妹和筆友們，現在嘅我唔能夠為您哋做啲乜，但係過去嘅27個月，一直有你哋嘅支持同關心，令我覺得好溫暖，亦感到之前嘅勞苦同犧牲都係值得。最奇妙係2017年所見到嘅異象，依家已經一一咁發生咗，事情嘅結局，勝過事情嘅發生同過程，所以喺患難中嘅同道亦要振作，因為患難生忍耐、忍耐生老練、老練生盼望。
衍龍 上2022年6月13日
閱覽更多精彩內容，請登入Patreon專頁：https://www.patreon.com/hinlung
多謝大家支持
hinlungwilliam
