Kristy 是暴動罪被告

[emily]

隨著巴黎殘奧閉幕，長達個半月的奧運週期結束。三年前的東京奧運，她是其中一名電視台奧運主持，今屆巴黎奧運前她剛剛完成兩年多的刑期出獄，「我有睇呀，睇電視，我出咗嚟兩三日就開幕。」

「其實做觀眾都開心嘅，無壓力，做主持嘅話就有好多顧慮，會俾好多壓力自己。」她是 Kristy 卓麗馨﹐2019 年 8 月 11 日，她在尖沙咀被捕，「就係爆眼少女嗰日」，2022 年 1 月，Kristy 暴動罪成，判監三年九個月。

「酸溜溜嘅感覺？有嘅，一定有嘅。」出獄後剛巧遇著奧運熱，Kristy 在網上分享得最多的，都是奧運消息，「好難免嘅，你會諗三年前嘅位置，而家我淨係可以坐喺度，如果我唔係罪成嘅話，其實呢日我嘅位置會喺邊度？」

「如果成日都咁諗，我自己會心理好不平衡，所以我都勸自己少啲呢種諗法。」

＊＊＊

雖然更多人記得她是奧運主持，但用 Kristy 自己的形容，她是一個體育記者，來自一個普通家庭，大學讀新聞系，畢業後做體記因為喜歡足球，「好鍾意睇波，踢我唔識㗎」，有留意她的動態會知道她是車路士球迷，即使在獄中仍透過體育雜誌留意愛隊，「睇車路士啲消息睇到好麻木」、「我都唔明佢買辛祖做咩。」2019 年夏天，她大學畢業，尚未入行就遇到人生最大的轉折。

「淨係想著做好眼前，做到咩就做咩。」

自由在倒數，19 年年底 Kristy 被落案起訴暴動，她選擇不認罪，「五十五十囉，我自己覺得係」，「當自己打得甩嘅心態過活，我覺得如果永遠都覺得自己打唔甩嘅話，我無辦法過好日子。」

Kristy 說她認識一些被告「覺得自己一定會坐」，結果在等候審訊期間「時間停頓喺度」，她就希望自己盡量積極面對。被落案起訴後一個月，她正式入行加入有線做體記，主要負責已停播的《愛．體育》，「我喺入面都有朋友同我講，你個節目執咗啦」，那段期間適逢疫情，很多體育賽事停擺，「成日去做訪問嘅主題就係，探討運動員喺嗰段時間點樣生存」。年半後，她幸運獲安排成為奧運主持之一，還因此上過娛樂版，「嗰時個心態可能都覺得，第一次亦都可能係最後一次，所以盡自己所有能力去做好。」

當時的觀眾並不知道，Kristy 是暴動罪被告。東京奧運閉幕後三個月，她的案件開審，最終罪成。

＊＊＊

那年夏天，剛大學畢業的 Kristy 22 歲，今年夏天放學，不經不覺已經 28 歲，同齡朋友大都事業已上軌道，組織家庭、結婚生仔，Kristy 就形容自己現在全部歸零，「事業零、愛情零，所有都係零，從頭嚟過囉。」

在入面的兩年多時光，她結束了一段七年的感情，原本的事業路途已經斷絕，要重返電視台就是「無可能」，「我知我入咗去之後，以前公司將我所有拍過嘅片都抽起晒。」

「其實呢樣我係唔開心，雖然可能係我作品，但某程度上都係運動員嘅一部分。你抽起咗我，其實都係抽起咗佢嘅成果，令人無機會去認識呢個運動員，我覺得係好可惜。」

從零開始的新生活，Kristy 說當然會感覺不安，但她不想說後悔，「事件發生咗，就唔講後唔後悔㗎啦」，放學後這兩個月，她在努力搵 part-time，「雖然屋企人好想我返工」，但她想的是，既然重新開始，她不想太快將自己鎖死在一份工作，「貿貿然將自己個人生咁快決定。」

「有好多嘢可以探索，我做咩唔試吓？」

試試其他幕前工作？她將在一些本地足球頻道亮相。開間小店做生意？也可以。Kristy 說，她目前最大的興趣，原來是車衫－亦是她獄中大部分時間被分派的工作，「大家都好出奇，我喺入面車咗兩年幾嘢，出嚟竟然仲想掂衣車。」

她近日在網上其中一個分享，就是在獄中「親手整咗件旗袍」，是這幾年她其中一件最自豪的事，「有一個真係教車旗袍嘅老師，教我哋由頭到尾點樣整一件旗袍。」

「我覺得自己做得幾好，好有天份！」

對一切抱開放態度，Kristy 說她唯一的堅持，是未來做的事，「要對得起自己」。

＊＊＊

對得起自己，在當今香港可能愈發困難，「其實一定有嘢做到嘅。」

訪問當日，Kristy 選了一間在內街不起眼的咖啡店，收銀台後放了一塊水松板，釘著的標語旁邊放了一隻連豬，「我覺得，既然係食，梗係食一間我覺得值得食嘅」，「又或者，寫多兩封信俾朋友囉。」

2024 年夏天的香港，很多事已經改變了，「離開」兩年多的 Kristy，比一直身處其中的人更直接感受到當中的差異，「好冷漠，或者係我唔習慣香港人好冷漠。」Kristy 說，這種冷漠未必有甚麼具體事例，只是一種觀感，「大家都好 focus 喺眼前嘅嘢，唔會去理身邊嘅人、所有嘅事…好想放低以前，定係只係唔願意提起。」

「我唔會怪佢哋啲咩，都係自己嘅選擇。」而她的選擇，是繼續樂觀地懷抱一些微小的堅持，「盡量去尊重自己嘅意願過活，做啲令自己開心嘅事，可能就係咁。」

訪問最後，Kristy 分享了一個故事，在獄中的日子有次慈山寺到牆內辦活動，「佢俾咗張紙我哋，叫我哋摺啲嘢，講吓代表啲咩」，而她用紙摺了一朵還未摺完的花。

「一朵花未摺完，代表未來仲有好多可能性，無人知未來係點，但只要相信，好嘅未來都會等緊我哋。」