邱宏達前往加拿大

[emily]

2019 年 10 月 1 日，健仔曾志健在荃灣中槍，身在現場的邱宏達想上前救人，被警員制伏，「救佢先啦，我唔走啦！」最終被捕的邱宏達，被控非法集結罪成，判監一年，由於當時他是理大在讀物理博士生，外界經常稱呼他為「博士」，「比較熟嘅朋友會叫我『阿水』，因為我個名叫宏達，英文偕音係 Water。」

22 年 6 月，博士刑滿出獄，出獄後這兩年多，他回到校園繼續研究工作，這個夏天約滿後，他登上離港班機，前往加拿大，「可以嘅話，都唔想離開香港。」

「即係你係想返嚟？」
「唔知到時呢個地方仲等唔等我呢？」博士說。

＊＊＊

「大家普通啲咁諗，就係呢度無機會，就試吓第二度啦。」博士離開的原因，很現實，而現實往往很殘忍。

當日在庭上求情，博士曾說自己希望服刑完畢後繼續研究工作，他亦趕及在判刑前完成博士學位，幸運地放學後有「某間大學」的教授給他機會繼續做研究。

「研究呢個世界，一日都發生好多嘢。」重回研究崗位後，博士說他發現自己「能力有啲跟唔上」，其中一個原因，是入獄八個月，再加上之後尋找研究崗位的四個月，前後接近一年的空窗期。

少少背景資料，博士的研究範疇是應用電磁學，「設計一啲結構去操縱電磁波，做一啲比較特別嘅行為」，或許有點一頭霧水，但大概可以想像是一種較專門、或至少在本地不算熱門的研究，換言之，約滿之後博士其實很難再在香港找到類似的研究崗位。

對於這走向，博士其實有心理準備。所以過去這一兩年，他打聽過是否有投身教學的可能性，「機會應該就無嘅，大學所屬機構都要你申報有咩案件，香港完善咗之後，都對一啲監察好給力」，他亦一直有嘗試在創科界搵工，「主要係而家興緊嘅 AI 研發。」

「搵過 3、40 份叫唔叫多？我唔清楚。Interview 就有嘅，但似乎我真係唔係佢哋要搵嘅人。」和未能繼續做研究是因為空窗期能力跟不上一樣，搵工不順利博士亦不想只是歸咎自己有案底，「我自己嘅研究工作，同 AI 的確有啲距離。」

「我有諗過，如果我係一個請人嘅人，我見到有一個唔係做開 AI 相關研究項目、有個比較貼題啲，一個有案底、一個無案底，我會點選擇，我會咁樣諗。」

博士形容他身負的案底，是一種「額外嘅背景資料」，「我唔會太惡意去諗。」

「原來我除咗唔係學術界嘅人才之外，都唔係 industry 嘅人才。」博士苦笑說。

而當似乎所有的門都已經關上的時候，機會又再出現在博士的眼前，「事緣請我嗰位教授，佢都有俾過 advice：如果香港搵唔到嘅，試吓外國有無機會。」結果在遙遠的加拿大，博士再找到大學的研究工作，「咁就只可以離開一陣。」

＊＊＊

所以博士說，離開香港原本不是他的計劃，「其實有部份人，當初都係希望想香港變得更加好，先會出咗嚟，其實佢哋內心都係愛香港。」

「我希望你會知道或者會接受，其實我喺嗰類人。」

但現實是，博士和過去幾年很多香港人一樣，為了更好的將來，或者過一種想要的生活，只能離鄉別井。三年前被判入獄之前，博士曾經在一篇訪問中，提到自己並不後悔當日救人，因為他認為救人是人性。

三年過後，博士付上了牢獄的代價，案底成為了伴隨他一生的「背景資料」，回首過去，是否仍然無悔？

「我隱晦小小咁講啦。」博士說，他曾經有次和健仔聯絡，「佢同我講，覺得唔好意思。」

「我話，當初呢個決定係我自己做嘅，係呀，呢個決定係我自己做嘅。」

後記

訪問期間，可以感覺到博士的不安。雖然他說自己並不後悔，但當年的經歷對他的影響的痕跡仍處處可見，在公開地方他不時帶上口罩，訪問地點他希望是無任何外人的私人地方，「有啲嘢，只可以靜靜雞，係一啲認為安全嘅地方講。」

博士笑著說，記者和他都是奉公守法的人，分別是「本身奉公守法」的人，和「奉公守法的更新人士」，講的都不是一些敏感內容，但為免「隔離嗰個聽到，有啲人會為國家感到憂慮」，所以訪問地點要小心選擇。

確實，這幾年香港已有太多變化。

今年 32 歲的博士說，自己十多年前開始留意香港民主運動發展，大型社會運動後的退潮，他和很多香港人一樣見過很多次，「14 年嗰時、16 年嗰時，最後都係咁樣樣」，但今次不一樣的是，運動退潮後衍生的不是抗爭路線的分歧，而是絕對的沉寂，「一種靜係靜待，另一種靜就係沉默。」

例如說，過去 20 年都是香港社會主軸的政制發展、民主追求，已經在這個城市消失，「基本法 45 條係咪寫，咩慢慢達致真普選，唔會再有人想同你討論，呢個寫喺一本書仔上面嘅話題」，餘下來的，是生活、生存，「每個人要過返正常生活，大家過得好就好。」

當年入獄前，博士曾經在一個訪問中說﹐希望健仔可以努力繼續生活，「如果有日我喺天涯海角再撞返你嘅時候，你記得點頭笑下」﹐而今他已身處海外，祝願博士生活安好，有日天涯海角重遇，再笑道別來近況。