2022/11/18三年

[emily]

2022/11/18三年

2019/11/18，［件事］至今眨眼已經三年，呢三年黎一直都銘記於心中。上兩年因為肺炎肆虐，所以我上庭既日子一而再再而三咁延期同改變，橫越左我選校，讀書同畢業出黎工作既階段。每相隔數月就要上一次庭，成幾百頁A4紙既相片口供證據同埋幾百小時既錄影帶記錄，三十幾間既審訊。終於都一一捱過左，等待既都係法官所決定既一個判決，影響住囚人欄裡面十一個人既命運。

當日警署扣留48小時後我就被荷槍實彈押上法院，我好記得由囚車望出去既天空係黑色，雙手被綁上膠索帶（保釋到後麻痹左幾日） 。好記得個日法院要OT到凌晨，我十一點先保釋到出黎，保釋既代價條件係全餐（沒收passport，宵禁令同一星期警署報到）。每個星期要突登set一個鬧鐘，為既就係要去警察簽個到就完成個個星期既任務，好記得唔記得帶手機而［嘟］唔到安心出行，要來回的士趕番屋企拎電話。好記得Mid-term exam既時間撞左報到時間所以要提早去捕住兩點正簽完到就的士趕番屋企online考試。好記得有宵禁個陣一直都好羨慕人地可以去露營，去釣墨魚，而自己永遠都要趕尾班車番去既日子，因為知道違反保釋條件既話就會被還押，未審就自己申請坐左半年先！

我比較幸運，當時有得保釋出黎，由初初既保釋條件全餐漸漸都減去左宵禁同埋警署報到。算係嘗試過半年正常人既生活，唔需要再被指住鼻咁做人，奈何時間過得真係好快，審訊判決既日子愈近，心裡面既焦慮就愈大。現在可以做既事情就只有預備好入去要閱讀既書本，聽下出獄手足既在囚分享、選擇定裡面會修選既課程、學習入物資同探訪既流程。之後既就係盡人事安天命了，知道若果我在囚既時候屋企人需要為我四處奔波，在囚物資、進修、日用品都係一啲為數唔少既支出，Patreon我會繼續寫文章分享我既心路歷程，當然在囚時都會拜託人幫我分享我獄中既書信。好讓我出獄後可以有自己既計劃，坦然面對人生。

二十多歲既我從小都未曾想過自己會有一日會成為階下囚，生活係香港呢個溫室，原本哪怕係行超級市場，連一粒糖都唔會搶唔會偷，如今若罪成的話面對住三至四年刑期既判決，心知道大環境既判決都係唔好既結果，我都要努力為自己打算，面對自己既人生。

Btw，我都算好彩既可以係候判既時候睇到飯戲攻心同正義迴廊呢兩套咁有意思既港產片！

Patreon link https://www.patreon.com/hongkonger0501

hongkonger0501