<寫於裁決前>

[emily]

<寫於裁決前>

13 November 2022

寫於裁決前，對於裁決，答案係毫無懸念的，甚至乎從一開始就已經係無懸念，所以心情上無特別緊張，反而有一點點期待，因為又到了馬拉松嘅其中一個關卡，雖然未知道距離馬拉松終點有幾遠，總好過一直等落去。

近日睇到幾位手足嘅訪問，心情滾動之餘亦提醒了我不少，原來自己一早諗通嘅想法係仍然需要其他人去affirm自己，曾經無數次出現於我腦海嘅點解/why me/what if/如果乜乜乜嘅N個假設，慶幸後來已經搵到答案去說服自己而唔需要再糾纏落去。而睇到梁嘉麗訪問Auman當中嘅一句「再行多一次，必然還是會發生的」，因為「這是命運，他是這樣理解的，這些都是無可迴避必然發生的，並非個人能夠影響或改變。」知道有人同自己一樣諗法，感覺實在有點兒亢奮，亦都係一種提醒，又例如推理小說作家受訪當中所講嘅「他與大多數受訪者一樣，坦然不喜歡香港，還抱怨着這個地方讓人討厭的種種。但對一個地方真正的愛，卻不會被這些缺點埋沒」、「他想留守，親眼見證城市的變遷」，實在empower了我不少，me表示無補充。

人始終需要同行嘅力量，而有時同行未必來自同一時空同一地方，而係來自歷史嘅必然。不論係近日好想睇嘅一套台灣電影《流麻溝十五號》所描述白色恐怖時期於「火燒島」又名「綠島」上嘅政治犯、抑或蘇聯時期嘅古拉格群島被勞役、被思想改造嘅所謂「有害分子」，許多許多都係深具文化、思想、知識嘅棟樑；而回到眼下所經歷嘅一切，再一次證明歷史嘅無可迴避，當然各種傷痛絕不能比擬，但當明白一切實屬必然後，心頭亦稍為放鬆少少，而我非常希望歷史嘅無可避免可以到我哋呢一代為止。

U上

walkwithu__