【年度十大】- 岑敖暉

[emily]

【年度十大】

想寫年度，雖然收到之時叱咤一早完咗，但算是留個記錄給自己，寫連到/十大，其實即是寫年度情緒之總和、有關書寫年度情緒總和之不可能。

2022年，「可算快樂/我亦有些難啟齒」Wyman仍然係好屈機，喺一首貌似「大路情歌」中，用一句就輕輕鬆鬆搞掂咗，我估好多人都有既欲言又止、依依哦哦：「吓，快唔快樂？好難講喎……好差？又唔係嘅……er…吓…唔係…唔係好差…快樂？吓…er…」係囉，就係咁囉。「講到未來，只有懷疑與懷疑」如果要講大路嘅年度，係呢首㗎喇。

本來嘅大路年度，一定係〈我地〉：哇，兩個最care嘅我地，一首歌納晒，完全沒有解釋之必要：「若你值得我傾慕，萬物馬上輕於鴻毛/就是最後不見歸路/越絕望抱得越牢/閒人別來這地叫做我地/如逆境迫我跟你爭氣/頑強撐下來就成傳奇/大難因愛不死/昂然唱著我地我地/危難只會將我跟你/餘生共融煉成傳奇/靈魂緊扣守出轉機」okay，還需要解釋嗎。之所以是「本來」，是728過後， （聽歌的） bearing同coordinates完全唔同晒：好難「昂然」啦，唉，〈We are All〉之夾硬嚟及令人不適感，我估好多人都講過（ OK ？吓，邊忽OK … ）對於年尾，焗投呢首，諗起就覺得好心噏，鼓勵、支持定傷害？傷害、支持定鼓勵？頭痛唔頭呢首，都逃不出這個complex。「如還在乎我地我地我地/仍舊可爭氣爭氣爭氣/時常講別離別離別離/誰來栽種生機」是呀，無論如何，都不可以、不可以、不可以放棄栽種生機。好多嘢都可能係，唯有係咁先啦，「唯有係咁先啦」之中，再搵方法栽種生機。在愛裏栽種生機，在栽種生機的練習中滋養和學習愛，也是年度主題和主要日常練習。

仍然係阿Wy同欣宜，〈恐懼蠶食心靈〉極好呀，「相擁的瞬間應該極滿足/偏偏轉過身失聲地痛哭/練習忘記你/尚未失戀已習慣了/就算遇上一生的歸宿/好的東西有某個定律/最近似完美的/劇情最短促」這首之「好」，不在於歌詞，而是唱完這一堆「內容」之後，一句撻埋嚟：阿仔，恐懼蠶食心靈呀。以前的心境，頗像首歌的內容，害怕美好，恐懼擁抱美好，讓我痛苦， ；不過在修練去愛及被愛的過程中，以及身處在越來越shit得一塌糊塗的世界中，咁樣其實真係唔係好得，被恐懼侵佔自己，繼而讓恐懼侵佔及蠶食心靈，不可能去愛，不可能被愛，也不可能去創造出些什麼；要練習擁抱美好啊，要練習提着及待着出現在自己眼前、心裏的美好呀，不努力做這個練習，是生存不到的呀。

〈人啊人〉，食撚屎啦，你係人，新疆棉嗰啲唔撚係人，好嘔心，一聽到即刻熄機/轉台。

Okay，然後耀輝就話：「默認著大家都平庸/會慨嘆自己都有惡/再發覺到底想著善/疲倦嗎仍然靠著我坐下」呢首係連到最愛之一。係個人靜落嚟嘅時候，會好被觸動到嘅歌。是啦，不需要也不要想到自己有多天花龍鳳，其實好多包袱都是自己畀自己，自己其實好平庸，也實在有「惡」，有啲嘢，做唔到就真的做唔到，無論如何勉強自己，自己都係做唔到自己所唔能夠做到嘅事，但無論如何，仍然想努力做一個善的人啊，這首歌講鬧交，我同余思朗梗係會鬧交、成日鬧交，沖口而出的說話，互相傷害的說話，時常有之；「鬧交」本身算不上什麼… 我算是「pro鬧交」的一派，有衝突，最好不要迴避，「鬧交」最辛苦時，如果不幸地，在探訪時間內「鬧不完」，那麼抱歉，就必然要帶着場交返倉，對住場交，直到下一次探訪，先有機會「擺脫」。快則一兩日，慢則10日八日，是很可怕很折磨的體驗。然後泳/輝說：「怎麼將希冀換過 永遠有掙扎/然而因真誠而活 永遠會不壞/有猛風吹過 有猛火燒過/然後你靜了 為我靜了/然後吻著我 未來再多幾次的吵架」好迷輝/泳嘅位係，幾乎每一首歌，都係講點樣用盡生命的氣力去掙扎，而這種暴烈的掙扎的同時，又有一種好舒服的溫柔「仍然有我/仍然有你/仍然靠著我坐下」雖然感覺上一啲都唔激烈、一啲都唔暴烈，但耀輝的詞，經常都有種感覺是，他是用盡生命的力氣去寫。

今年的「我最喜愛」其實是泳兒，〈早上37.2度〉及〈葉落冰川〉都是好好。「是笑 是喊 是太輕或是太重/上半生是上半生 是沒法形容/是我 是我 是我的就是我的/或一些需要自責/但一些可以自豪」是太輕，或是太重，真的不知道，只是有時候，真的好累。如果可以，靠着余思朗坐下……那有多好。不過想一想也覺奢侈。

Ian某種曲風，我好鍾意喎。剛剛那首〈地球上最後一朵花〉，intro的那段哼唱，每一次波都會閉上眼睛感受。不過我比較喜歡年頭的〈留一天與你喘息〉。有時真係會覺得好攰，坐監係24/7，年終無休，冇得放假，有時真的好累好累。〈留一天〉的意境，是經常做meditation的沉浸意象之一「唯一想 留一天 與你喘息 由衷的 真心的/平靜裡安躺 棲身一抹暖光/游入了思海 看日落天荒/悠悠一刻抬頭 星空萬象綻放/如聽到我有種嚮往/其實我只想 棲身一抹暖光/沒說出口 心聲可以釋放/曾是獨個苦惱徬徨/卻是你 行入深鎖的這個房/不必太煽情太過悲壯」

如果真的要選一首「我的年度」，那無疑是鍾說及雲姨的〈到了那裏就對吧〉。謝謝鍾說，因為此歌創造了一個偶然，這個偶然爾後送了好多份珍貴的禮物於我，有好多份，可能仲係擺喺度唔使點拆，不過也許有其實沒那麼多偶然：The Divine Matrix is always responding. 但這首不能在此詳述了。

寫到呢度唔係好寫到嚕。有關寫年度十大之不可能， 2022是切開晒一忽一忽，要做一個整合，沒有能力做到。點解無柳仔？唔係無柳仔，係柳仔嗰舊嘢完全係另一個horizon嘅嘢，唔可能砌到喺呢度；嗰舊嘢太黐線，我估我都冇能力寫到做「文字」。

原來得六首，砌多四首啦：岑寧兒〈無常家〉，方皓玟〈HW1〉，林家謙〈記得〉，Serrini〈樹仔〉。

「再見了 再見了 傲氣」再見了 再見了， 2022 ，byebye你條尾。

Lester

Dec 2022

岑敖暉