情人節似乎適合講依個話題
亦都希望每位高牆相隔的你地
都可以用你地獨特的方法慶祝情人節
上星期的一宗暴動判刑
從新聞內容得知
一對夫婦在審訊前結婚
最後雙雙決定認罪
由於新聞中詳細講述佢地的背景
令我諗起有唔少情侶都係決定在另一半入學前結婚
而佢地結婚的決定
我大膽假設係因為一個身份
因為懲教只會憑依份結婚證書上的身份
給矛直屬的身份
依對夫婦雙雙入學
令我想講下「院所之間探訪」
院所之間探訪係俾兩個同樣係在囚人士之間的見面機會
而依個探訪亦俗稱「鵲橋」
也許申請的人多數係夫婦
佢地就好似牛郎同織女咁好艱難才見一次
所以有鵲橋依個俗稱
以下係我所知有限的資訊
～～～～～～～～
在囚人士必須為直系親人
所以亦只有夫妻關係可以申請探訪
女朋友/未婚妻在懲教眼中只係朋友身份
傳說佢地的申請大概每三個月可以有一次見面的機會
亦會計算為一次探訪（即係同牆外親友探訪次數共用）
傳說CatA（甲級囚犯）未必適用
咁點樣決定邊個去對方院所？
係根據刑期長短而定
刑期短的人會被帶去對方的院所探訪
唔洗諗
用返有玻璃的探訪室
如果突然記得啲咩或者你地有咩資料可以提供/更正我
隨時話我知，再補充！
————以下係不實用分享—————
記得在兩年前
當時去赤柱探佢的時候
遇見過兩次鵲橋探訪
都係後來回想先知道
當時坐在等候室
突然有兩個姑娘（懲教女職員一般叫法）帶住一個女仔行入去探訪室
佢地在我面前經過
所以好記得…
佢地一左一右將女仔夾在中間
各扶住佢一隻手
而個女仔手上則戴上鎖鏈
因為個畫面幾震驚而令我之後去探究發生咩事
後來先知
個女仔當時著的係佢地平時著的黃色囚衣加啡色冷衫
認識左依件事就會諗
當佢地同時被囚禁
平時寫信要靠監通
寄一封信到對方手上可能要兩星期至一個月
探訪就要三個月可能先見到一次
佢地的處境比起一牆相隔的情侶更難
如果調返轉去諗返事情的起因
我又覺得
正正係搵到一個同你一齊衝的人
係好難能可貴
而我相信佢地就係堅定的相信對方
希望佢地可以不久的日子就可以見面
handwritingletters
