今朝同今晚都見到Manson!!! 是日大滿足
上次睇唔到叱咤頒獎Manson入場果下，今日補睇番
係deep V西裝! 係見到胸 見到只係幾秒，我內心已經__左 好想一直睇!!（變態!）今晚繼續睇只係睇到半集嘅《Fashion Killer》，請左Manson同Zeno做嘉賓，俾設計師為佢地設計MV服裝。今日係最後一組（總共三組）去講解佢地嘅設計，佢地為Manson設計嘅服裝上半身係有一件背心嘅fur（毛皮）。
入黎之前我已經好鍾意Manson，但都唔夠了解佢
（不專業的小粉絲），入黎之後係筆友信中先知原來佢係佛教徒同埋素食者!（我之前只係知佢對佛有興趣同種菜
） 作為一個素食者，其實除左會唔食動物，好多時都會避免使用動物產品，就好似我就選擇唔會用真皮革同真毛皮。我見到件衫就有諗Manson會唔會在意件fur!?果真，Manson一開口就問：「我想問呢件fur係用咩整?」設計師有回應話係假fur黎，193亦有補充佢地係唔鼓勵用真毛皮同埋節目組冇咁多預算去買真毛皮。Manson都有再補充覺得個設計好rock，但對毛皮好敏感，所以會在意係用咩去整件fur
Manson係我心中又不斷加分了感激佢會開口去問、去提出一個值得他人同設計師關注嘅事情，亦想借寫低我對佢嘅欣賞再去同大家分享下我係動物權益範疇內對毛皮嘅認識。每年係灣仔除左會舉行書展、動漫展、BB展、寵物展等等，仲會舉行皮草展。我都有參與過2、3年嫁，不過唔係入場參與，而係喺場外跟住動物機構NPV同其他動保友參加「反皮草大遊行」。我地披住人地捐贈嘅真/假皮草（只作示威/教育展示），揸住一張張揭示皮草血腥真相嘅相，吶喊住口號去迎接呢場「盛事」。
我未入過會場，但可以上網搵到場內影嘅相，就係一抽抽皮草（我寧願叫佢做動物屍體）懸掛係倒作展示。都幾震撼嫁，雖然屍件不全，肉體同毛皮分離，只剩毛皮果部分，但清晰展現到一隻動物嘅形態，清楚分辨到尾、四肢、頭嘅位置，如同觀賞緊一個動物屍體展，真係好噁心。
動物死後屍身會僵硬，難剝皮，亦有說動物死後先剝毛皮會冇咁靚（我忘記原因），所以皮草繁殖場當然地會為左利潤而選擇活剝動物嘅毛皮。可以上網搵到唔少活剝嘅片段，伴隨住動物嘅吶喊聲咁觀看。動物被扯去毛皮並唔會即時死亡，但佢地已經無力係呢段極漫長嘅等死時間內掙扎，只剩下血淋淋嘅肉體瑟縮一角氈抖同微弱嘅悲鳴聲。我諗佢地寧願刀唔只係𠝹係皮上面，開一缺口，更可以一刀插入佢地心臟，爽快取命，至少可以逃脫左死之前嘅地獄痛苦。
最好笑嘅係皮草商為自己嘅暴行冠上「環保」（?????）之名。我第一次聽到皮草竟然可以同環保扯上關係，真係呆左
! 唔知你地以前行宜家傢俬IKEA去到地氈果區有冇見過有一大幅牛皮被掛起，隔離有塊說明嘅展示牌寫住塊牛皮係肉類屠宰場嘅「副產品」。呢個就係商家口中所稱嘅「環保」!?「隻牛反正都要死、要俾人劏嫁啦，環保啲，用到盡，攞埋佢層皮! 唔好浪費呀嘛~」咁動物園（本人反對動物園）啲動物過左身，啲皮/毛皮係咪都要攞黎披，啲肉係咪都要攞黎食? 或者最貼身嘅寵物去世，係咪都要用到盡?「環保呀嘛，生前用盡，死後更不要浪費」哦! 原來「環保」係咁嘅意思! 佢真係好意思搬「環保」呢個美名出黎遮掩自己嘅惡行!
但唔好忘記其實有好多毛皮/皮革所用嘅動物都唔係平時攞黎食用嘅動物：貂、兔、蛇、鱷魚等（
我記唔到），所以環咩保呀!?你人工繁殖生財工具，扯完層皮就當肉體係垃圾，仲係倒講環保? 你攞哂所有已有資源轉型做真正嘅環保產業先好講「環保」!莉莉心室
