#CS2200280 致移記巴斯打

[emily]

#CS2200280
致移記巴斯打：（長文慎入）
「被蒸發的17天公眾假期，永久負鐘正式展開」
唔知大家有無發覺，經過膠層們多年來精心布局同供會聯署力推嘅8.23更表，已經準備就緒，響各關口推行得如火如荼/或即將被推行。
驟眼睇8.23同一直行之有效嘅各口岸舊更表，並無多大不同。但魔鬼在細節，原來8.23推行後，雖然美其名係令大家每日返少左0.5hour，事實上同一直以來的返工安排無咩分別，但變相每張更表要負鐘5.幾hr，羊毛出自羊身上，一年落黎就係負鐘120幾小時，細心一諗，甘即係我地每年的17日紅日公眾假期補鐘，無緣無故就被蒸發了。重點係，我地從來無被通知過，紅日補鐘安排已正式取消，想問下，我地成年返足工，點解會無緣無故無晒d紅日，仲要長期負鐘呢？
雖然你話做得force都預左紅日要返工，無假放，無得陪屋企人，大時大節要照顧市民出行需要等等，但紅日返左工，平日補返假或鐘應該都算係人之常情，其實其他部門都係補假補鐘，但奇怪的是，被蒸發紅日的只有返緊前線輪班拼搏嘅伙記，返95位嘅一樣紅日照放，有鐘照補，試問一句，當初提出推行8.23嘅膠層，你地良心過意得去嗎？你有得開開心心放紅日享受天倫之樂嘅時侯，對得住紅日向前線砌嘅伙記嗎？又試問當初主張聯署嘅供會同事，你地當時係被人蒙騙定盲L左，又定係有咩檯底升職交換條件，令你甘心情願睇住成班前線巴打每日辛辛苦苦捱返黎嘅紅日補鐘，白白被蒸發？你地仲敢講係幫緊我地同事家庭幸福著想？你地做左d甘嘅事而升職，你地良心會不安嗎？
未醒覺嘅同事，睇清真相未呀，佢一開頭試行嘅地方就係恰我地班acting多嘅地方，遇上工作安排上有咩不公我地acting緊都唔敢出聲。會出聲嘅同事就調走。但依家縱觀各大control，陸續推行8.23之後，可見的成果只有弊多於利，亦變相方便管理層繼續硬推各項不合常理的工作安排，例如強推連續長A pattern，放棄行之有效嘅FA pattern，完全妄顧同事家庭需要及生理健康；妄顧同事返放工交通安排嘅無薪留後/早返安排；以往的OT賺鐘/DSOA安排，以後只會變相做義工，填氹還負鐘；d break 胡亂安插，無得連住，同事起身行到去休息室無耐又要行返出去，等於無抖過；appraisal無故斷tick；經常計少扣錯鐘，而且d鐘嘅更新常有延誤，令同事無法追查；種種亂象罊竹難書。
睇返現已強推8.23嘅地方，同事除左AL之外，跟本再無自己可決定放嘅假，亦無鐘可補，即使閒日拎AL亦諸多留難，無理唔批假之事時有所聞，令前線同事在照顧家庭及返工之間難以取捨，而且好多措施都係一不離二，二不離三，如果8.23之後係7.8, 7.23呢，再同大家講你地嘅annual leave 或週假已經融入你地嘅更表，係咪代表公司以後就可以要求前線同事日日都返工，365日天天上班，年中無休，大家都要照做？真係未聽過一間公司為左剝削員工基本嘅紅日法定假期補鐘安排，會無所不用其極到如斯地步。甘樣嘅管治方針可算人治之至，用行政手段凌駕法例賦予員工嘅基本勞工權益，而非政府一直奉行的應有法治之舉。
其實老細為上位，優化管理同事措施，大家都明，但做到今時今日這個地步，真係過份左，你地為左上位嘅私利，選擇要放棄絕大部分前線嘅基本勞工權益。真係好咩？
大家要明白前線好多地方多年來一直行之有效嘅制度，係經過幾多代前人一齊默默耕耘，協商而得返黎嘅成果，你地為左上位想改，有無諗清楚個後果。要幾多代後人幫你執屎，處理前線士氣長期低落，極大怨氣種種衍生出的問題。
真心希望，睇到這裏嘅你，無論係膠層，出賣同事利益嘅供會人士，前線也好，為人為己，支持暫緩全面強推8.23，及要求公司全面重新審視某d地方現行非常不合常理的措施，重新制定一個經所有前線提供意見，經真正咨詢後嘅2.0版本/或全面恢復以往多年來行之有效的編更安排，否則長此下去，只會令前線積怨日深，亦代表離聞到西蘭花味，或去到其他申訴渠道或部門嘅時侯不遠了。
部門一言堂，假咨詢，漠視員工基本勞工權益！
供會無能，正事不做，淪為擺設！
放任無聲侵吞紅假，公道自在人心！
「知迷途其未遠，覺今是而昨非」
乙個想反映真實現況，提醒上大人及供會既得利益者，還同事正常合理和諧工作環境的小人上