真。香港人 - 討論組

#CS2200289
本人即將 / 已離開入境處呢個大家庭（勿起底），作為一名曾經滿腔熱誠嘅散仔，對於全面復常後有小小感想想同同事 & 廣大市民分享。（長文慎入）
出入境篇*
1）
明白大家慣咗3年疫情口罩生活，但過關時請大家自動自覺除口罩對樣，有小朋友嘅家長請拖實比返關口應有嘅秩序，大家都係方便大家，你過得到我 我過得到你。
(A) 通常都會衍生到態度問題，部份尊貴嘅香港居民對於被要求除口罩對樣或問自己姓名時會顯得不耐煩甚至拒絕正面回答，想溫馨提示返同事 & 市民 詳情可參考返香港法例第115章<<入境條例>>第4同第5條。
(B) 老總/主任處理呢類型case時，我懇請你哋先考慮前線同事喺counter遇到嘅情況，要顧及 & 平衡各方面，唔好只係將自己放喺首位，淨係想管靚個場多一事不如小一事，有時前面同事做足本份，你就搭搭膊頭放人走，其實好影響士氣同埋會灌輸錯誤資訊比個客變本加厲，希望你地唔好忘記條底線。
(C) 曾經同我地有誤會或者自覺高人一等嘅香港居民，如果你地過左香港關之後都可以維持同一種態度同一種高傲，而唔係突然之間懂得收斂同雙重標準，我會對你哋多一份尊敬。
2)
手持Doc-I俗稱黃簿/黃本/簽證身份書嘅香港居民呢幾個月陸續從內地入境返香港，當被問到證件過期時通常都理直氣壯回答「疫情封關丫嘛，返唔到黎呀」等字眼，其實唔緊要的，我地部門幾時都以客為本，最終主任都會簽(Restricted)比你入境香港，不過想大家留意返香港同祖國從來都冇lock down過的，而擁有香港居留權嘅人我地係唔會亦無權阻止你入境香港的，所以希望未來***AX香港人唔好一黎就習慣聲大大將責任推卸比他人。
(A) Doc-I非永久居民如何升格成為香港永久性居民？
最主要條件「通常居於香港」7年且合法逗留，而最近呢批doc-I過期嘅香港居民，呢3年絕大部份都唔喺香港，即代表佢地第5-7年或第6 and 第7年都係喺中國內地居住，而據我觀察到大部分手持過期doc-I嘅人士離境時都拎住張已核實永久性居民身份證資格，行內俗稱「恭喜信」嘅物體，我作為愛國一份子當然唔係對國家政策有任何疑問，不過對於「定居」和「通常居住」定義 & 如何演繹 留返比大家思考。
3）
AI & 科技毫無疑問會係全球黎緊嘅大趨勢，而我地部門早於04年已發明e-channel，亦曾獲獎無數；顧名思義「自助出入境檢查系統」，但大約20年後嘅今日唔知係文明倒退定設計者悉心用意，好多人不論R定V都唔太識點插卡/擺放/打指紋/望鏡頭等，仍然需要依賴人手去輔助或協助，咁到底仲係咪叫自助？我到而家都傻傻分不清人手自助？不過唯一可以肯定嘅係人工智能睇怕若干時間內都無法取代我地同事嘅地位同重要性（請自行解讀）。
暫時分享住咁多先後會有期。