我是個怕輸的人 仍然扮勇敢

[matrix]

23 April 2023

It’s all about making choices. 經過咗「大審判日」之後終於的起心肝寫呢封信，其實喺之前入咗嚟兩年嘅日子都諗住寫封信記錄低當時嘅感受，但寫咗兩三段之後發現寫唔落去，唔係因為冇感受，而正正係因為感受實在太多但寫唔出。

對於結果，已經沒甚麼好談，只不過好想喺呢個時間點作一個總括，尤其是我發現近年不論陣營，不論立場都好潮興用一種講法（或者say詮釋），就係話因為一啲人物講咗一啲嘢去令班年輕人相信左一啲信念/理念，繼而令到呢一班真心相信嗰種理念嘅人受傷（其實係因為上星期日我聽完健吾，如果我冇理解錯的話 Btw我竟然聽健吾，笑）。首先，受傷我係絕對承認嘅，但對於呢種說法，我都好想表達下。於我自己而言（起碼for我自己一個人），我並唔係因為聽咗甚麼人說了甚麼話而去相信，而係因為眼前嘅荒謬，因為對錯，因為我想我鍾意嘅呢個地方變得更好，而唔係變得更壞使然。就算當時係衝動、係上頭、係情緒氣氛促使都好，都係我自己嘅選擇，好多時回頭睇返都有時會懷疑自己，但始終會同自己講，不論係當年行出每一步、定係決定留喺度去承受呢一切、還是唔認罪打其中一單，都起碼係我自己作出嘅選擇。It’s all about making choices. 我唔會講甚麼對得起自己嘅選擇呢啲老土說話，我只係想提醒住自己要尊重當時作出呢啲選擇嘅自己，就算而家睇返再唔理性都好，因為而家實在好多人嘗試割離from當年整個社會，甚至連當年嘅自己都嘗試割，但當然要明白選擇背後往往連帶好多代價而且不輕，不得不承認嘅係種種虧欠、不孝、自私，我唯一可以做嘅係要緊記，對於好多好多好愛我錫我關心我緊張我幫咗我好多嘅人，我要用我嘅餘生好好報答佢哋，inspired by蔡子強專欄（又，我竟然睇蔡子強！？笑again haha, 但都要比返個credit佢嘅）

雖然將來仍然充滿變數，而我仍然有一半路程要捱（嘔），但起碼有一個終點可以盼望，我依然好想講句：希望可以順利地後年見！喺判刑嗰朝清晨5點幾，機緣巧合下聽到「聖馬力諾之心」。當中有一句歌詞我一直記住，記到出庭面對判刑一刻，嗰句就係「我是個怕輸的人 仍然扮勇敢」（希望冇記錯），就算係「扮」都好。

U上

walkwithu__