親愛的女兒：
HAPPY BIRTHDAY !!! 不知不覺間你已經 3 歲了。雖然你喺媽媽，仲有太婆喺心自中永遠都只是個孩子，但以貓咪而言你己經係個不折不扣嘅大人，如果當初我哋冇紮到你的話，爸爸媽媽可能抱孫了（講笑）。
最近爸爸正喺到整理相簿，睇返呢 3 年嚟由我同媽媽影嘅相。就好似重溫你嘅成長過程一次咁。仲記得第一日接你返屋企嘅時候，我同媽媽都手忙腳亂，擔心你唔適應新環境同食物，亦擔心我哋冇辦法照顧好你，但當見到你喺屋企四周探索咗成日之後，安心訓喺我哋為你準備嘅床仔嗰陣，我哋內心嘅喜悅實在難以形容，屋企從此會多個新成員呢件事亦首次變得有實感。呢幾年間你真係長大得好快，細個嘅你係可以完全訓喺你鍾意嘅貓抓板上面，到今日，同一件玩具卻連比你晾下隻手都好似唔多夠位，所以話小朋友真係望少眼都唔得。 好似轉個頭你又會肥咗同大隻咗咁。
作為你嘅父親，錯過你嘅成長對我而言係好大懲罰。 就算將來我哋會再次一齊生活都好，已逝去嘅時間都唔會重來。我哋無論喺生理定心理上都冇得倒帶返去我哋分別嘅一刻。喺你呢幾年嘅記憶之中，我呢個爸爸大概會變得好模糊，你極其量可能會記得自己咬爛過爸爸寄返屋企嘅家書，又或者普魯斯特式咁透過聞我著過上庭嘅衫而回想起昔日嘅我哋。而站喺我嘅角度，呢兩年我同樣地只能透過相片同媽媽口中得知你嘅情況，被逼隔空睇住你成長。但即使係咁。爸爸從來冇停止期盼我哋再次相聚嘅一天，到時我會開次執起逗貓棒，好似以前咁陪你跑遍屋企每個角落。你好熱定身了
最後，今年又陪唔到你過生日嘅爸爸想為你送上一段來自周國賢〈陽光燦爛的日子〉嘅歌詞，希望你新一年可以繼績健康茁壯成長，愛你
// 祈求讓你了解 動盪年代有太多怪事情
凡人為每日艱苦生活拼 而你是吃苦的幹勁
明日是好動 還是好靜 讓我緊張你無止境 //
豬爸
08.03.2023
編按：Fergus都渡過咗佢喺獄中嘅第二個生日
梁晃維
