反送中運動四週年，今年Bristol 嘅集會會喺六月十號下晝兩點半舉行

[emily]

Source: 真•香港人在Bristol facebook page

反送中運動四週年，今年Bristol 嘅集會會喺六月十號下晝兩點半舉行，除咗回顧反送中運動之外，我哋會設置梁凌杰義士靈位，方便參加者獻花同悼念，默哀儀式之後我哋會錄影合唱榮光交俾美國手足剪輯成612全球齊唱榮光，集會最後會以人鏈作結，歡迎大家自行印制文宣向途人展示。相信大部分手足已經喺Bristol安頓落嚟，平時都忙於返工、返學，因此，我哋希望集會盡量喺一個鐘頭之內完成。

另外，集會前街站嘅主線會係發信要求英國政府處理喺英國嘅海外公安局、保障在英港人免受跨國欺凌同埋取締孔子學院，副線街站會繼續做47人案請願信，如果大家得閒歡迎早少少嚟幫手。

#毋忘2019 #毋忘初心 #梁凌杰 #UK #Bristol #孔子學院 #47人案

[emily]

各位，返送中運動四週年集會喺嚟緊嘅星期六(10/6)下晝舉行啦，集會前街站會喺一點鐘開始，主線原本係發信要求英國政府處理喺英國嘅海外公安局、保障在英港人免受跨國欺凌同埋取締孔子學院，雖然英國政府啱啱要求咗中共停止運作海外公安局，我哋會改一改封信繼續另外兩個訴求，而副線街站會繼續做47人案請願信，如果大家得閒歡迎早少少嚟幫手。另外。我哋會喺街站旁邊設置梁凌杰義士靈位，大家可以獻花悼念(環保一點嘅話，紙花其實都係一個好選擇) 。

集會會包括回顧反送中運動、默哀儀式、錄影合唱榮光交俾美國手足剪輯成612全球齊唱榮光同埋人鏈幾個環節，歡迎大家自行印制同今次集會主題相關嘅文宣向途人展示，我哋亦都印製咗少量文宣俾冇自備文宣嘅朋友使用。由於我哋會影啲相做記錄而合唱榮光環節會錄影俾美國手足剪輯成612全球齊唱榮光，請大家盡量戴帽同埋口罩，以保障私隱。重申一次，我哋係唔會影大家大頭，如果發現有不明來歷人士影大家大頭，大家可以影返佢轉頭之後將啲相交俾我哋，我哋會集合哂啲相交俾MI5同埋保安大臣要求處理，喺英國領土我哋絕對唔會容忍任何人干擾我哋嘅集會同言論自由，為確保集會順利進行，我哋已經知會咗警方。最後，暫時睇天氣預告都仲係有可能落雨，大家到時記得帶定遮或者防水風褸。

喺香港而家連一隻歌都會俾人禁嘅環境，希望大家盡用我哋可以發聲嘅機會。