大學果時參加左個活動去一間獸醫診所參觀，事後follow左佢嘅Facebook。有次見到佢地經漁署救左批被走私嘅倉鼠，共200隻被走私，佢地攞左二、三十隻，招義工去幫手照顧下，我報左名。到診所幫下餵下水、糧、清下籠，對其中一隻鼠情有獨鍾。隔兩日，我掛住隻鼠，決意番去領養佢，就咁隻介乎布丁色同紫倉色嘅倉鼠（
一開始布丁色，越養越灰）就成為左我第一隻倉鼠，佢叫阿Bu
（仔）呢個就係佢，佢左耳真係崩左嫁!過左一排收到診所老細私訊，問我識唔識人想做獸醫助護，我話冇，佢話「不如你做呀!」，我：「我未畢業，要讀書呀!」佢：「都放暑假，做住先啦!」。就咁做左兩個月倒，我好肯定唔係責任，唔係窮，係愛
一星期番五日，輪更，通常星期六日唔放，朝十晚八，最常兩、三點先放飯，月薪$8,300（頭3個月實習期，極低薪，廉價勞工黎
）。人生第一份全職，人工極低，但番得開心充實。細細個「我的志願」係醫生
可惜冇材，不能讀醫，如果做醫生我會做外科醫生。對做手術有種着迷嘅幻想，生物嘅奧妙或者喺果刻呈現到。做獸醫助護可以望住獸醫幫貓狗做手術，真係勁興奮，而平時又成日對住啲貓貓狗狗，勁開心。手術通常都係絕育，偶有例外，但都手術成功，若太嚴重，呢間小小嘅診所仔都唔收症，所以一直冇接觸到貓狗嘅死亡。
有日有對夫婦求診，到診症室佢地打開籠物袋，一隻奄奄一息的白狗，瘦得可憐，毛打結，眼沒張開，身體不斷抽搐，大概沒有甚麼意識了。醫生細看狗身上還有小瘤，並爆開流膿。主人應是刻意等到狗醫都無法醫治，才帶狗來着獸醫打一針「安樂」死。哈，一點也不安樂。「佢呢幾日野都食唔到啦，我今朝都淨係餵左啲保礦力俾佢」女主人一臉哀傷咁講，係哀傷嘅，我講緊隻狗。最令人氣憤嘅係佢問左以下一句......
「我想問可唔可以攞番佢嘅晶片出黎？我住公屋嫁，但我想再養多隻狗。」到底可以有多無知、無良才想得出這念頭，完全點燃我們心中怒火。唔願帶狗及早就醫，唔願花醫藥費，仲要攞番晶片？
那女人大概是入伙公屋前就已養此白狗，入公屋時登記此狗晶片，申請飼養此「伴侶狗」，可是公屋一向除「伴侶狗」外不准飼養狗隻，所以此狗一離世，他們就無法飼養其他狗隻。他們居然想出「絕世好方法」，欲取其晶片植入下一隻狗，那就合法飼養下一隻狗。
不花錢醫狗，狗受身體之苦，當然心靈上我想亦是崩潰。取晶片之念頭當然狗不知，沒直接對狗造成身心損傷，但揭露出果個女人，果對夫婦點看待隻狗，間接影響到隻狗點被對待。只係一隻陪伴嘅工具？健康果時OK! 唔健康、有問題果時，無視，不處理，直到你都救唔到，送你一程「安樂」死，到底係隻狗安樂，定係主人想借「安樂」呢兩個字合理化自己行為，減低自己罪疚，甚至最後美化下自己？「我令佢走得舒服啲喎!」「舒服!?」
我地着主人離開診室等候，獸醫、我同另一個護士係倒咒罵主人，真係好嬲。果次係我第一次亦係唯一一次接觸安樂死，佢地已經接觸過，但都係第一次聽到人提出攞番晶片呢個「另類」要求。白狗失去生命，主人入黎睇番遺體，女主人流眼淚，我唔明白佢淚水包含左啲乜野，但我對佢作出好壞嘅想像，哭只是程序，只係跟從社會上普遍親人、熟人死會喊嘅現象。
果排有日同獸醫食飯，佢話佢養緊隻北京狗，其實係一個客帶黎安樂死嘅狗。狗有病，客唔肯俾錢醫，醫生見有得救，唔想打果一針，但知佢唔做，個客都會帶隻狗去其他診所問安樂死，問題出現係主人倒。最後獸醫提議不如俾佢養。客OK，隻狗就多左幾年命，並有個好主人。冇錢、冇責任、冇承諾、冇愛真係唔好養動物。佢地都會生、老、病、死，而非得生同死，中間嘅所有過程，都係你要陪佢走過嘅路。
莉莉心室
