【歧義種子】Kiri T
自從同Geniuz，Janice ，MC等人合作後，更加多樂迷認識嘅Kiri今次solo作品希望赤裸地展現由細到大嘅自卑， 唔自信，少少自嘲成份但又唔想太凝重，所以採取相對輕鬆氛圍嘅編曲，只用到三拍嘅純鋼琴作為開段verse嘅伴奏，並於中間慢慢加入strings元素。
‘’每天活到最享受～‘’
搵到鐘說填呢份中文詞同鼓勵自己更坦誠唔逃避地唱出嚟，同時亦帶著要欣賞自己嘅態度，此外一齊監製嘅陳考威都係Kiri嘅廣東話咬字上幫手修正咗唔少。嚟緊打算集中出歌唔搞show住嘅佢視今作為嚟緊新碟嘅種子，亦透露下首單曲會挑戰co-write中、英文詞，因為比起自己作完英再交俾人填中更能寫實抒發第一身感受。
【One step at a time 】Jaime 張天穎
同樣擅長幕前幕後兩方面，以及英語作詞嘅佢，今次將爸爸教導嘅戀愛觀以歌曲表達出嚟，與舊時簡單直接當面嘅模式唔同，現今我地經常透過社交媒體去認識一個人，甚至暗戀對方呢種挑戰感被 Jamie 套用到歌詞裡面去。
‘’Take it slowly…… One step at a time ‘’ 不斷於chorus 重複嘅呢兩句，就有如去年嘅作品例如｛No money no honey｝好似本當代戀愛手冊。曲方面於intro階段運用了strings嘅plunk技巧，營造出少少waltz 嗰種彈跳感，呼應番一步一步嚟嘅呢種曖昧。曲、詞、編、監自己一手包辦哂，期待今年聽到更多咁張天穎風格嘅歌！
【五星筆記 Goodest English】初九ft. JFFT
近嚟愈嚟愈多youtuber由拍片拍到副業，甚至主力唱歌。初九今次同JFFT合作帶嚟呢首為考DSE 嘅各位打氣嘅歌，阿酸協力作詞並由Mel主力作曲。‘’個個禮拜狂背tense變幻守則……次次串錯詞彙背後有伏係要操‘’ 係熟悉同令人又愛又恨嘅求學回憶。
＜題外話＞
小弟雖然唔係咩尖子但都叫做考到三粒星番嚟㗎！如果計埋分卷就總共五粒
前排黎咗個鼻鼾好勁嘅人，醒瞓的我每晚都被響醒幾次。有晚小弟發惡夢俾鬼追仲要隻嘢發出“喀喀’聲勁恐怖，嚇醒咗先發現係果條友
啲連續尖鼻鼾音
萬幸過咗排佢就走了！
wing_sparkling
