真。香港人 - 討論組

多謝大家前日出席公開論壇，反應比預期中熱烈好多。唔少人反映多倫多好少有呢d比大家聚埋一齊交流同討論嘅空間，所以我哋都希望之後會有機會再搞類似嘅活動；多d聽下唔同手足嘅意見、反思下自己嘅不足，再作出相應嘅行動。

首先要為當日好差嘅音響設備道歉。一眾admin其實對音響了解甚少，網上自費買咗個音響後，check過佢運作正常就拎咗出嚟。點知即使係差滿電嘅情況之下，咪箱係半個幾鐘內就冇曬電。感恩現場嘅朋友都好願意幫手，又借usb線、尿袋、掛腰mic比我哋；可惜最後都係要靠各位發言者大聲d嗌，令後排觀眾未必聽得好清楚。

活動結束後，唔少參加者私底下聯絡我哋，表示可以借物資比我哋，甚至有有心人士希望贊助我哋買音箱。基於Somebody其實只係成立咗1年左右，係冇任何實蹟下唔希望佔用過多社會資源，畢竟最有需要嘅都係在囚手足；所以之前每次活動嘅物資都係由admin自費購買。但過往多次嘅設備問題令我哋不得不反思究竟可以點樣改善，所以我哋會就住呢個問題開會研究。希望可以比翻個交代大家，避免下個活動面臨同樣問題。如果大家有唔用嘅音響可以比贈予我哋用，請pm 聯絡。

最後，好多謝參與活動嘅每一位。大家對每位發言者都非常尊重，反應亦都好encouraging；正正係呢種氣氛，令唔少原本唔打算出嚟講嘢嘅人願意分享自己嘅睇法。此外，大家發表意見之餘，亦有提出實際嘅行動建議。而我哋都留意到今次大家好有默契咁冇影相/錄影，提供左一個保障大家私隱嘅空間。亦好開心見到活動結束後，唔少人留低同其他參與者交流討論。

為咗比唔得閑嚟到嘅人都可以睇到大家嘅發言，我哋都係呢個post簡單整合咗各參加者嘅意見。希望下次活動都見到你哋！