Frances Hui 許穎婷 一件離開香港後未有啟齒的事

[emily]

Frances Hui 許穎婷

一件離開香港後未有啟齒的事：

有時喺到做野做到好迷失時就會諗，其實我一直都好想喺香港做返個記者，做好多有意義嘅故。毎當諗到呢到，就會覺得自己當初唔應該走。
無講過，亦都唔敢講，係因為覺得一定會有人認為，我走咗先可以講到咁輕鬆，又好似會俾人感覺輕視香港記者近年所承受嘅種種，聽落點都似係風涼說話多啲。認真，走都走咗，又無人迫你。
毎次做訪問被問到有無後悔，我都唔係好知點答，一來唔想喺公共平台散發負能量，二來都唔知點講落去好，所以毎次都只好輕輕帶過，將重點放返喺自己離開咗之後可以做啲咩。
諗返兩年前離開香港嘅自己，當時先啱啱大學畢業，掛住一個所謂國際線人物嘅身份，自然覺得呢個就係自己對香港嘅價值，以為自己喺出面會比起自己匿喺香港更有幫助，但又好似都無諗過自己想點，開唔開心。
依家要去解釋返當初呢個選擇，我會覺得我只係喺一個正常人都未知道自己想點嘅人生階段下，無可奈何地要用72小時嘅時間去做一個返唔到轉頭嘅決定。
又有人會問，點解唔做返記者。一來係我已經係一個政治人物，唔會再有具公信力嘅媒體公司會肯請我做記者做reporting，二來我只係對香港呢個地方抱有要發掘新事物同紀錄人情味嘅熱誠。呢樣野唔係香港就已經唔係嗰回事。
圖中係喺七年前我為 曦望 Dawnews 創刊號寫故仔，第一次真真正正做嘅訪問，當時嘅緊張同興奮我到依家依然歷歷在目。文章嘅質素都唔需要深究，但嗰次嘅經歷絕對奠定咗我要喺香港做記者嘅呢一個目標。
呢份熾熱，慶幸尚有光影留住。