(BHK轉載9)【V4HK 實際點運作？】
呢個計畫旨在動員持有英國國民（海外）護照同其他喺英國合資格投票嘅香港人，積極參與嚟緊嘅 2024 年英國大選，發揮港人社群最大影響力。參與大選可以將香港議題帶入英國嘅主流政治討論，保持公眾對香港事務嘅關注，有助港人社群喺英國累積政治影響力，因此係至關重要。其實，政治參與唔一定要係參選，以下就等我哋講解下 V4HK 嘅理念同實際可以點做。我哋有三個主要目標：
(1) 推動英國政界持續關注受在英港人留意嘅事務；
(2) 梳理在英港人在外交政策外，更為廣泛嘅政治訴求； 及
(3) 加強在英港人社群行動力，凝聚英國港人公民社會組織，從而推動港人參與英國社會。
V4HK 將會涵蓋同上述目標相關嘅事務，包括但唔限於對香港同中國嘅外交、移民同政治庇護、教育、就業、健康同住屋等議題，羅列喺呢啲事務上政府可對應採納嘅唔同政策，中肯咁分析佢哋嘅利弊，等香港選民可以清楚咁作選擇。喺計畫嘅最後階段，我哋會邀請候選人簽署政策承諾書，請佢哋指出支持嘅政策選項。具體嘅政策範疇同承諾細節我哋仍然草擬緊。
我哋會集中投放資源喺比較大同活躍嘅香港社群，以及政黨間有激烈競爭嘅關鍵選區，務求最大程度咁發揮港人社群嘅影響力。假設今屆大選會如期喺 2024 年第二季至第三季舉行，V4HK 嚟緊嘅工作包括：
* 2023 年第四季至 2024 年第一季：進行外展工作 —— 為在英港人舉辦英國政治簡介工作坊、協助港人社群登記成為選民、舉行民意調查等
* 2024 年上半年：聯繫港人組織並與候選人交流 —— 喺延續原有工作嘅基礎下，聯繫目標選區內嘅政黨支部同候選人，以及舉辦社區論壇
* 梳理在英港人訴求
* 遊說政黨支持同收集候選人簽名
* 總結各政黨候選人嘅回應，供在英港人參考
香港人可以點參與？
V4HK 會聯同各個合作組織，喺英國港人聚居嘅社區籌辦同英國大選有關嘅活動，主要包括港人熱門關注議題問卷調查、英國政治制度簡介講座，同埋社區論壇。我哋衷心希望，呢啲活動可以幫助到在英港人社群，了解同質詢唔同政黨嘅候選人，令各黨更理解同重視港人嘅訴求。活動嘅詳情將會稍後公佈，我哋期待在英港人都會積極參與選前活動同英國大選，一齊以民主撐民主。
#Vote4HK
#一票在手 #以民主撐民主
要求制裁香港官員聯署
加入聯署宣傳抗爭活動嘅英國TG公海
加入TG公海