劇協反擊｜主持人說「紅線」成罪證 馮祿德：今次真的話畀人聽有條線

[emily]

劇協反擊｜主持人說「紅線」成罪證　馮祿德：今次真的話畀人聽有條線

藝發局指控去年「香港舞台劇奬」的頒獎嘉賓，加上台上兩位主持人以「紅橋」、 「紅線」為話題，形容為「意有所指、語帶雙關」；又稱如以此手法「引起公眾及媒體注意」及「製造社會話題」，藝發局不能苟同。香港戲劇協會主席馮祿德回應稱，「我哋發夢都冇諗到嗰度有事！」

馮祿德說，在現時這麼敏感，在未完全透徹了解的情況下，已不止一次提出究竟底線去到幾多，怎為之違法，但藝發局「冇講清楚畀我地知」。

他說，主持人都是一個藝術家藝術很多時由《詩經》開始，「我哋講唔到直接嘅，我哋唯有委䛷地提出我哋心聲和要求，『上以風化下，下以風刺上，言之者無罪，聞之者足以戒，』何為戒？有則改至，無則加勉，有誤會溝通，然後齊齊諒解。」

馮說，主持人如此委婉提出要求，可見他們有多痛苦：「我哋業界真係戰戰兢兢、步步為營，但係藝術係唔可以限制創意。政府都贊成有創意工業，點解唔清楚講清楚，我哋點樣為之合法？」他說，在有限知識下，都盡量做到合法，而又認為合理的事，「但我哋係人嚟㗎，自然有人情，要合情。我唔怪主持人，但佢哋怪。」至於被藝發局指引起公眾、媒體注意，他說他們沒有高調提出紅橋、紅線，更在獲信件後多次翻看片段，形容「我哋發夢都冇諗到嗰度有事。」

馮祿德又說，每屆都很擔心得獎者發表的感想，「人哋咁難得咁有成就，講出自己感想，乜都唔做，明知冇發達仍然願意投身藝術，冇辦法供養父母，仲要靠父母資助，一旦得獎係少少安慰雙親，講出感想、對人生的盼望。點解係會踩線呢？」馮說，劇協都會提醒得獎者，如發表感言，「盡量留意唔好掂到會令人唔舒服，或者令人以為你犯咗法嘅字眼，尤其呢個時代。我冇諗到，我哋腦裡諗乜都畀人猜想。第一我未必有、第二我冇講出來，第三你估我冇諗乜嘢？連我思想諗乜嘢你都估我，你要我思想諗乜嘢講出嚟，你連我思想創意都想知道⋯⋯你同我一齊『度橋』？」

馮祿德說，今次決定真的「話畀人聽有條線，紅唔紅唔緊要，但唔肯講條線喺邊到」。他又以「踩坑渠」作比喻，他說今次的行為有如不小心「「踩坑渠」，而對方就是告訴他們「真係有坑渠」，可是「坑渠」在哪裏？對方的態度如像告訴他，要從今次事例約莫猜測、揣摩：「點揣呀？到我揣到時我已中咗招，踩咗隻腳入坑渠，扭親了；點解唔坦坦白白？又話互信又話溝通？我哋唔介意你講明㗎。」